भीमफेदी-कुलेखानी सुरुङमार्ग प्रदेश सरकारले बनाउने
<p>काठमाडौं। काठमाडौं-हेटौंडा जोड्ने सडकखण्डमा प्रस्तावित भीमफेदी-कुलेखानी सुरुङमार्ग निर्माण गर्न वाग्मती प्रदेश सरकार अग्रसर भएको छ।</p>
<p>प्रदेश सरकारले अहिले सो सुरुङमार्गको विस्तृत परियोजना प्रतिवेदन (डीपीआर) तयारीको काम गरिरहेको छ।</p>
<p>सुरुङमार्ग निर्माणका लागि यसै वर्ष नै ठेक्का दिने तयारी गरिरहेको छ।</p>
<p>सुरुङमार्ग निर्माणको अनुमति पाएको निजी क्षेत्रका नेपाल पूर्वाधार विकास कम्पनी लिमिटेड (एनपीबीसीएल)ले अहिलेसम्म काम नगर्दा प्रदेश सरकारले अग्रसरता देखाएको हो।</p>
<p>२०६९ सालमा सुरुङमार्गको शिलान्यास गरिएको थियो। अहिलेसम्म सो कम्पनीले सुरुङमार्ग निर्माणको आर्थिक स्रोतको आधार नै पेस गर्न सकेको छैन।</p>
<p>नेपाल पूर्वाधार विकास कम्पनीले सो सुरुङमार्ग निर्माण गर्ने गरी वैशाख २०६९ मा मन्त्रिपरिषद्ले निर्णय गरेको थियो।</p>
<p>वाग्मती प्रदेशका मुख्यमन्त्री डोरमणि पौडेलले भीमफेदी-कुलेखानी सुरुङमार्ग निर्माणका लागि अहिले विस्तृत परियोजना प्रतिवेदन (डीपीआर) तयारीको काम भइरहेको जानकारी दिए।</p>
<p>उनले भने, “डीपीआर निर्माणको काम अन्तिम चरणमा छ, चैतसम्म डीपीआरको काम सकिन्छ। डीपीआर सकिनेबित्तिकै निर्माणका लागि ठेक्काको प्रक्रिया अगाडि बढाइन्छ।”</p>
<p>अहिले बोलपत्र आह्वानका लागि तयारी भइरहेको आजको गोरखापत्रमा समाचार छ।</p>
<p>“सुरुङमार्गको डिजाइन प्रमाणित भएपछि निर्माणका लागि बोलपत्र आह्वान गरिन्छ”, मुख्यमन्त्री पौडेलले भने।</p>
<p>चिनियाँ र नेपाली परामर्श कम्पनीले संयुक्त रूपमा ‘डीपीआर’ को काम गरिरहेका छन्।</p>
प्रतिक्रिया दिनुहोस्
.jpg)
