सभामुखबारे सहमति खोज्न नेकपा अध्यक्षद्वय ओली र दाहालबीच बालुवाटारमा छलफल
<p>काठमाडौं। सत्तारुढ नेपाल कम्युनिष्‍ट पार्टी (नेकपा) दुई अध्यक्ष प्रधानमन्त्री केपी शर्मा ओली र पुष्पकमल दाहालबीच सभामुख उम्मेदवारको विषयमा छलफल भएको छ।</p>
<p>सभामुख चयनका लागि सहमति कायम गर्न प्रधानमन्त्री ओलीसँग परामर्शका लागि अध्यक्ष दाहाल बालुवाटार पुगेका थिए।</p>
<p>"भर्खर भेटघाट सकेर बाहिर निस्क्यौं, निचोड के निस्क्यो भन्‍ने बुझ्न बाँकी छ", दाहालका प्रेस संयोजक विष्‍णु सापकोटाले देखापढीसँग भने।</p>
<p>सभामुखका लागि नेकपाभित्र सुवास नेम्वाङ, अग्‍नि सापकोटा लगायतका नेताको नाम चर्चामा छ।</p>
<p>सभामुख निर्वाचनको कार्यसूची तय गरेको यसअघिका तीनवटा बैठक नयाँ सभामुखबारे टुंगो नलागेपछि निरन्तर सूचना टाँसेर स्थगित हुँदै आएको छ।</p>
<p>६ माघ दिउँसो १ बजेको लागि बैठक पुन: तय गरिएको छ।</p>
<p>२६ पुसमा नेकपा सचिवालयको बैठकले उपसभामुख शिवमाया तुम्बाहाङफेलाई राजीनामा दिएर सभामुख निर्वाचनको बाटो खुलाउन आग्रह गरेको थियो।</p>
<p>त्यो आग्रहलाई अस्वीकार गरेकी तुम्बाहाङफेले सभामुखको उम्मेदवार तय गरेपछि मात्रै आफूले राजीनामा दिने बताउँदै आएकी छन्।</p>
<p>उनले आफैं स्वत: सभामुखको दाबेदार भएको भन्दै नेकपा नेतृत्वसँग राजीनामा नदिने अडान राखेकी छन्।</p>
<p>नेकपाका प्रवक्ता नारायणकाजी श्रेष्‍ठले भने ६ माघमा डाकिएको प्रतिनिधि सभा बैठक शुरु हुनुअघि नै उपसभामुखले राजीनामा दिने र सभामुख चयनको प्रक्रिया शुरु हुने आज बिहान बागलुङमा पत्रकारसँग बताएका छन्। </p>
प्रतिक्रिया दिनुहोस्
.jpg)
