अग्नि सापकोटालाई नेकपाले सभामुखको उम्मेद्वार बनाउने !
<p>काठमाडौं। सत्तारुढ नेपाल कम्युनिष्‍ट पार्टी (नेकपा) ले अग्‍नि सापकोटालाई प्रतिनिधि सभाको सभामुखको उम्‍मेद्‍वार बनाउने भएको छ।</p>
<p>आज बिहान नेकपा अध्यक्षद्वय प्रधानमन्त्री केपी शर्मा ओली र पुष्पकमल दाहालबीच बालुवाटारमा भएको छलफलबाट सापकोटालाई उम्‍मेद्‍वार बनाउने सहमति भएको स्रोतले बतायो।</p>
<p>आज साँझ ४ बजे बस्‍ने सचिवालय बैठकले सभामुखको उम्मेद्‍वार सापकोटालाई बनाउने औपचारिक निर्णय गर्नेछ।</p>
<p>नेकपा संसदीय दलका उपनेता सुवासचन्द्र नेम्वाङले अध्यक्षद्वयको बैठकमा सभामुखको नामबारे सहमति भइसकेकाले आजै साँझ बस्‍ने सचिवालय बैठकले टुंग्याउने <em>देखापढी</em>लाई बताए।</p>
<p>२६ पुसमा नेकपा सचिवालयको बैठकले नेकपाले सभामुख पदमा उम्‍मेद्‍वारी दिने निर्णय गर्दै उपसभामुख शिवमाया तुम्बाहाङफेलाई राजीनामा दिएर सभामुख निर्वाचनको बाटो खुलाउन आग्रह गरेको थियो।</p>
<p>तर, तुम्बाहाङफेले पहिले सभामुखको उम्मेद्‍वार टुंग्याएपछि मात्रै आफूले राजीनामा दिने अडान राख्दै आएकी छन्।</p>
<p>तत्कालीन सभामुख कृष्णबहादुर महरा बलात्कार प्रयासको अभियोगमा जेल चलान भएपछि प्रतिनिधिसभा सभामुखविहीन छ।</p>
<p>सभामुख निर्वाचनको कार्यसूची तय गरेको यसअघिका तीनवटा बैठक नयाँ सभामुखबारे टुंगो नलागेपछि निरन्तर सूचना टाँसेर स्थगित हुँदै आएको छ।</p>
<p>६ माघ दिउँसो १ बजेको लागि बैठक पुन: डाकिएको छ।</p>
<p>नेकपाका प्रवक्ता नारायणकाजी श्रेष्‍ठले पनि ६ माघको बैठकबाट सभामुखको निर्वाचन प्रक्रिया शुरु हुने भन्दै त्यसअघि नै उपसभामुखले राजीनामा दिनेमा आफू विश्वस्त रहेको बताएका छन्।</p>
प्रतिक्रिया दिनुहोस्
.jpg)
