प्रदेश ५ः नाम र राजधानी तोक्न दबाब
<p>रुपन्देही। प्रदेश ५ को पाँचौ हिउँदे अधिवेशन ५ माघदेखि शुरू भएको छ।</p>
<p>चौथो अधिवेशन झन्डै चार महीनाअघि सकिएको थियो। त्यसपछिको पहिलो बैठकमा प्रदेशको स्थायी राजधानी र नामाकरणको विषयले प्राथमिकता पाएको छ।</p>
<p>प्रदेश सभा सदस्यले यही अधिवेशनबाटै प्रदेशको नामाकरण र स्थायी राजधानीको टुंगो लगाउनुपर्ने धारणा व्यक्त गरेका छन्।</p>
<p>उनीहरूले चार महीना अवधिमा जनताले स्थायी राजधानीको कुरा उठाएकाले अब ढीला गर्न नहुने बताए। यो अधिवेशन सकिँदा नाम र स्थायी राजधानी प्रदेशले पाउनुपर्ने उनीहरूको माग छ।</p>
<p>नेकपाका पूमुख सचेतक भूमिश्वर ढकालले यसअघि दलहरूकै सहमतिमा प्रदेश सभाबाट महत्वपूर्ण निर्णय भएको बताए। नामाकरण र राजधानीको विषय सहमतिबाटै टुंग्याउनुपर्ने बताए।</p>
<p>“नाम र राजधानी सिफारिसका लागि गठित उपसमितिले प्रदेश सभामा प्रतिवेदन पेस गरेपछि हामी सबैले छलफल गरेर टुंग्याउन सक्छौं”, उनले भने।</p>
<p>प्रदेशको नामाकरण र राजधानी निर्धारणको लागि दीपेन्द्र पुन मगरको संयोजकत्वमा समिति बनेको थियो। समितिले आफ्नो प्रतिवेदन प्रदेश सभामुख पूर्णबहादुर घर्तीलाई बुझाएको छ।</p>
<p>प्रदेशको नाम लुम्बिनी राख्न एकमत देखिएको छ। राजधानी भने बुटवल, दाङसँगै कपिलवस्तुलाई पनि विकल्पका रूपमा हेरिएको आजको अन्नपूर्ण पोष्टमा समाचार छ।</p>
<p>कांग्रेस सचेतक निर्मला क्षेत्रीले हिउँदे अधिवेशनले नै राजधानी र नामाकरण टुंगोमा पुर्‍याउनुपर्ने बताइन्।</p>
प्रतिक्रिया दिनुहोस्
.jpg)
