प्रदेश २ः राष्ट्रिय सभा सदस्य उम्मेद्वार सिंहको उम्मेद्वारी खारेज गर्न उजुरी
<p>धनुषा। प्रदेश २ अन्तर्गत राष्ट्रिय सभा निर्वाचनका उम्मेदवार शेखरप्रसाद सिंहको उम्मेद्‍वारी खारेजीको मागसहित उजुरी परेको छ।</p>
<p>नेपाल कम्युनिष्ट पार्टी (नेकपा) र राष्ट्रिय जनता पार्टीका संयुक्त उम्मेद्‍वार रहेका सिंहको उम्मेद्‍वारी खारेजीको माग गर्दै निर्वाचन अधिकृतको कार्यालय जनकपुरमा उजुरी दर्ता भएको छ।</p>
<p>नेपाली कांग्रेस र समाजवादी पार्टीका संयुक्त उम्मेदवार भोला पंजियारले निर्वाचन कार्यालयमा सिंह अयोग्य रहेको भन्दै उम्मेद्‍वारी खारेजीको मागसहित उजुरी दर्ता गराएका छन्।</p>
<p><strong>कुटपिट मुद्दामा कैद सजाय</strong></p>
<p>सप्तरी जिल्ला अदालतले २० असार २०४४ मा कुटपिट तथा अंगभंग मुद्दामा दुई वर्ष कैद र जरिवानाको फैसला सुनाएको थियो।</p>
<p>अदालतको फैसलालाई सगरमाथा अञ्चल अदालत राजविराजले सदर गरेको थियो। सर्वाेच्च अदालतको १ पुस २०५६ पुनरावलोकनको निस्सा नहुने भई अन्तिम भएको भनेपछि कैद सजाय भुक्तान गर्नुपर्ने थियो। तर, उम्मेद्वार सिंह फैसला कार्यान्वयन गर्नुको सट्टा फरार सूचीमा थिए।</p>
<p>कैद भुक्तान नगरेको र फरार सूचीमा रहेकाले राष्ट्रिय सभा जस्तो गरिमामय सदनको उम्मेद्‍वार बन्न अयोग्य हुने कांग्रेस–समाजवादीका उम्मेदवार पंजियारले दर्ता गराएको उजुरीमा दाबी गरेका छन्।</p>
<p>अदालतले कसूरदार ठहर गरेकालाई सत्ता पक्षबाट उम्मेदवार बनाई कानूनी राज्य र कानूनी शासनको मर्ममाथि आघात पुगेकाले उम्मेद्‍वारी खारेजीको माग गरिएको पंजियारकाे भनाइ छ।</p>
<p>राजपा नेपालका तर्फबाट अल्पसंख्यक समूहबाट सप्तरी तिलाठी कोइलाडी गाउँपालिका–४ का सिंहले र कांग्रेसका तर्फबाट राष्ट्रिय सभा सदस्यका उम्मेदवार रहेका पंजियार धनुषाको सबैला नगरपालिका–१० का स्थानीय हुन्।</p>
<p>नेकपा–राजपाको गठबन्धनका उम्मेदवार सिंहको उम्मेद्‍वारी खारेजी भएमा पंजियार अल्पसंख्यक समूहबाट एक्लो उम्मेदवार हुने र निर्वाचित हुनेछन्।</p>
<p>उम्मेदवारको विरुद्धमा परेको उजुरीको निर्णय निर्वाचन आयोगले गर्ने राष्ट्रिय सभा निर्वाचन कार्यालय प्रदेश २ का अधिकृत राजुकुमार खतिवडाले बताए। उजुरी दर्ता गरिएको र निर्वाचन आयोगमा जानकारी गराइएको खतिवडाले बताए।</p>
प्रतिक्रिया दिनुहोस्
.jpg)
