सभामुखमा अग्नि सापकोटा निर्विरोध, १२ माघमा घोषणा हुने
<p>काठमाडौं। प्रतिनिधि सभाको सभामुखमा नेकपा नेता अग्निप्रसाद सापकोटा निर्विरोध निर्वाचित हुने भएका छन्।</p>
<p>संसद सचिवालयमा आज उनको मात्रै उम्मेद्वारी परेपछि १२ माघ दिउँसो बस्ने प्रतिनिधि सभा बैठकबाट उनी सभामुखमा निर्विरोध निर्वाचित हुने भएका हुन्। </p>
<p>प्रतिनिधि सभामा प्रतिनिधित्व गर्ने प्रमुख चार राजनीतिक दलमध्ये नेपाली कांग्रेस, समाजवादी पार्टी र राष्ट्रिय जनता पार्टी (राजपा) नेपालले उम्मेद्‌वारी नदिएपछि नेकपाका उम्मेद्‌वार सापकोटा निर्विरोध निर्वाचित हुने भएका हुन्।</p>
<p>संसद सचिवालयले प्रकाशन गरेको उम्मेद्‌वारको अन्तिम नामावलीमा सापकोटाको मात्र नाम छ। </p>
<p>सापकोटाको प्रस्तावकमा नेकपा संसदीय दलका उपनेता सुवासचन्द्र नेम्वाङ र समर्थकमा नेकपाका प्रमुख सचेतक देवप्रसाद गुरुङ, राजपाका सांसद लक्ष्मणलाल कर्ण र पूर्वसभामुख ओनसरी घर्ती रहेका छन्।</p>
<p>६२ वर्षीय सापकोटा तत्कालीन् वाम गठबन्धनको तर्फबाट २०७४ को निर्वाचनमा सिन्धुपाल्चोक क्षेत्र नम्बर एकबाट कांग्रेस नेता मोहन बस्नेतलाई हराउँदै निर्वाचित भएका थिए।</p>
<p>सापकोटा नेकपा अध्यक्ष पुष्पकमल दाहालका विश्वासपात्रका रूपमा चिनिन्छन्। सापकोटाले यसअघि सूचना तथा सञ्चार र वन मन्त्रीको जिम्मेवारी सम्हालिसकेका छन्। </p>
<p style="text-align:center"><img alt="" height="682" src="https://www.dekhapadhi.com/storage/photos/shares/Politics/sansad-notice.jpg" width="960" /></p>
<p><br />
</p>
प्रतिक्रिया दिनुहोस्
.jpg)
