कृषि विकास बैंक ह्याकिङ प्रकरणः लहान शाखाका निमित्त प्रमुख पक्राउ
<p>काठमाडौं। महानगरीय अपराध महाशाखाको टोलीले कृषि विकास बैंक ह्याकिङ प्रकरणमा लहान शाखामा कार्यरत एक कर्मचारीलाई पक्राउ गरेको छ।</p>
<p>उक्त प्रकरणमा बैंकका निमित्त प्रमुख रहेका सुनिलकुमार झालाई पक्राउ गरिएको महाशाखाका प्रहरी प्रवक्ता एसपी ईश्वर कार्कीले जानकारी दिए।</p>
<p>‘‘उनी बैंकका ऋण अधिकृतसमेत हुन्, आजै हामीले पक्राउ गरेका हाैं,’’ देखापढीसँग उनले भने, ‘‘उनको प्रत्यक्ष संलग्नता छ वा छैन भन्नेबारे अनुसन्धान भइरहेको छ।’’</p>
<p>ह्याकरले उनकै युजर आइडी प्रयोग गरेर चार करोड ७३ लाख ९६ हजार रुपैयाँ विभिन्न व्यक्तिका नाममा ट्रान्सफर गरेको थियो।</p>
<p>उनीसहित अहिलेसम्म प्रहरीले यो प्रकरणमा १७ जनालाई नियन्त्रणमा लिएको छ।</p>
<p>युजर आइडी ह्याक गरिएको हो वा कर्मचारीले नै दिएको हो भन्नेबारे अहिलेनै अनुसन्धानबाट नखुलेको उनले बताए।</p>
<p>कृषि विकास बैंक लिमिटेडले लहान शाखाका शाखा प्रबन्धकसहित ६ जना कर्मचारीलाई निलम्बन गरिसकेको छ।</p>
प्रतिक्रिया दिनुहोस्
.jpg)
