निगमको अन्तर्राष्ट्रिय उडानका २५ पाइलटद्वारा सामूहिक राजीनामा (राजीनामासहित)
<p>काठमाडौं। नेपाल वायुसेवा निगमको ६० वर्षे इतिहासमै पहिलोपटक दुई दर्जनभन्दा बढी पाइलटले सामूहिक राजीनामा बुझाएका छन्।</p>
<p>व्यवस्थापनका कारण निगम धराशयी भएको तथा विदेशी र नेपाली पाइलटबीच सेवा-सुविधामा चरम विभेद गरिएको भन्दै उनीहरूले राजीनामा बुझाएका हुन् ।</p>
<p>अन्तर्राष्ट्रिय उडान भर्ने निगमका चार जहाजका ४० पाइलटमध्ये ९ माघमा २५ जनाले सामूहिक राजीनामा दिएका छन्।</p>
<p>वाइडबडीका तीन र न्यारोबडीका २२ पाइलटसहित २५ जनाले निगमका निमित्त कार्यकारी अध्यक्ष गणेशबहादुर चन्दलाई सामूहिक राजीनामा बुझाएका हुन्। राजीनामा दिने सबै स्थायी पाइलट हुन्।</p>
<p>राजीनामा बुझाउनेमध्ये १५ जना क्याप्टेन हुन् भने १० जना को-पाइलट हुन् ।</p>
<p>राजीनामा दिएका २५ पाइलट सबै बाहिरिए भने निगमको अन्तर्राष्ट्रिय उडान पूर्ण रूपमा बन्द हुनेछ। निगममा १३ विदेशी क्याप्टेन छन्। तर, क्याप्टेन र को-पाइलट दुवै नभई उडान गर्नै पाइँदैन।</p>
<p>निगमले हाल दुईवटा न्यारोबडी र दुईवटा वाइडबडी जहाजमार्फत नौवटा गन्तव्यमा उडान भर्दै आएको छ ।</p>
<p>"पाइलटहरूको सामूहिक राजीनामा आएको छ, सचिवज्यूले बोर्ड बैठक राखेपछि अजेन्डाका रूपमा पेस गर्नेछु," निगमका निमित्त कार्यकारी अध्यक्ष चन्दले भने।</p>
<p>व्यवस्थापनको कमजोरी र सुविधा तथा करका विषयमा विभेद गरेको भनेर राजीनामा आएको उनले बताए।</p>
<p>सञ्चालक समितिले राजीनामाको विषयमा समाधान निकाल्ने चन्दले बताए।</p>
<p>सामूहिक राजीनामा आउनु दु:खद भएको बताउँदै चन्दले पर्यटन सचिवलाई यस विषयमा जानकारी गराइसकेको बताए ।</p>
<p>तीन महिनापछि लागू हुने गरी राजीनामा बुझाएको एयरबस ३३० जहाजका क्याप्टेन श्रवण रिजालले बताए । निगम व्यवस्थापन सुधार हुनुपर्ने, साथै विदेशी पाइलट र नेपाली पाइलटको विभेद अन्त्य हुनुपर्ने आफूहरूको प्रमुख माग रहेको रिजालले बताए।</p>
<p>"प्रक्रियाअनुसार जाने हो भने एक महीना अगाडि राजीनामा दिनुपर्ने नियम छ। तर, हामीले आन्दोलनस्वरूप तीन महिनापछि लागू हुने गरी राजीनामा बुझाएका हौँ," रिजालले भने।</p>
<p><img alt="" height="1271" src="https://www.dekhapadhi.com/storage/photos/shares/Tourism/pilot resignation.jpg" width="952" /></p>
<p>निगमले विदेशी पाइलटलाई मासिक २३ लाख पारिश्रमिक दिने गरे पनि नेपाली क्याप्टेनलाई भने कम तलब दिने गरेको नयाँ पत्रिकाले समाचार लेखेको छ।</p>
<p>"नेपालीलाई पनि २३ लाख नै तलब दिनुपर्‍यो भन्ने हाम्रो माग होइन, नेपाली क्याप्टेन नै तयारी गरी विदेशीमाथि हुने फजुल खर्च रोक्नुपर्‍यो भन्ने हो," रिजालले भने।</p>
<p> </p>
प्रतिक्रिया दिनुहोस्
.jpg)
