आन्तरिक विवाद मिलाउन कांग्रेस शीर्ष नेताहरू देउवा निवासमा
<p>काठमाडौं। १४ औँ महाधिवेशनको तयारी र आन्तरिक विवाद मिलाउन नेपाली कांग्रेसका शीर्ष नेताहरूबीच आज बिहानदेखि छलफल भइरहेको छ।</p>
<p>सभापति शेरबहादुर देउवा निवास बूढानीलकण्ठमा आज बिहानदेखि नेताहरूबीच छलफल भइरहेको देउवाका स्वकीय सचिव भानु देउवाले जानकारी दिए।</p>
<p>बैठकमा सभापति देउवा, वरिष्ठ नेता रामचन्द्र पौडेल, महामन्त्री पूर्णबहादुर खड्का, उपसभापति निधि, महामन्त्री डा शशाङ्क कोइराला, नेताहरू सिंह र सिटौलालगायत उपस्थित छन्।</p>
<p>शीर्ष नेताहरूबीचको छलफलले ११ पुसको केन्द्रीय कार्यसमिति बैठकको निर्णयपछि नेताहरुबीचको उत्पन्‍न असन्तुष्‍टि र विवाद समाधान गरी टुंगो लगाउने बताइएको छ ।</p>
<p>बैठकमा आगामी महाधिवेशन तालिका, पार्टीका केन्द्रीय विभाग, भ्रातृ संस्थालगायत विषयमा छलफल भइरहेको छ।</p>
<p>विवाद समाधानका लागि यसअघि उपसभापति विमलेन्द्र निधि, नेताद्वय प्रकाशमान सिंह र कृष्णप्रसाद सिटौलाले विभिन्न चरणमा बैठक बसी सहमतिको प्रयास गरेका थिए।</p>
<p>यसअघि ८ माघ साँझ शीर्ष नेताबीच आज टुंगो लगाउने गरी सकारात्मक छलफल भएको थियो।</p>
<p>केन्द्रीय समिति बैठकले बहुमतका आधारमा पार्टीको महाधिवेशन, केन्द्रीय विभाग, भ्रातृ संस्थासम्बन्धी निर्णय गरेपछि पार्टी सभापति देउवा र वरिष्ठ नेता पौडेल पक्षबीच विवाद छ।</p>
<p>कांग्रेस केन्द्रीय कार्यसमितिको सो बैठकले पार्टीको केन्द्रीय विभाग २८ बाट बढाएर ४७ बनाउने, नेपाल तरुण दल केन्द्रीय कार्यसमितिको पदावधि छ महिना थप गर्ने, काँग्रेसको सबै तहका पदाधिकारी तथा सदस्यको पदावधि एक वर्ष थप गर्ने, केन्द्रीय महाधिवेशन २०७७ साल फागुन ७ देखि १० गतेसम्म काठमाडौँमा गर्ने लगायतका निर्णय गरेको थियो ।</p>
<p>सो बैठकमा आफ्नो माग सुनुवाइ नहुने देखेपछि नेता पौडेल पक्षका पदाधिकारी तथा केन्द्रीय सदस्य भने अनुपस्थित थिए। <em>रासस</em></p>
प्रतिक्रिया दिनुहोस्
.jpg)
