Others

गृहपृष्ठ

गण्डकी प्रदेशमा घट्यो ट्रायल शुल्क कास्की। गण्डकी प्रदेशमा सवारी चालक अनुमतिपत्रका लागि यातायात व्यवस्था कार्यालयमा ट्रायल दिँदा तिर्नुपर्ने शुल्क घटाइएको छ।  यस अगाडि ट्रायल दिन कार प्रयोग गरेवापत ३०० रूपैयाँ शुल्क तिनुपर्नेमा अबदेखि २४ रूपैयाँ मात्रै शुल्क तिरेर प्रयोग गर्न सकिने भएको छ। यातायात व्यवस्था कार्यालय गण्डकी र सनराइज ड्राइभिङ स्कूलअन्तर्गतको कुसुम सप्लायर्सको सहकार्यमा उक्त रकममा छुट प्रदान गर्न लागिएको हो। १५ माघबाट लागू हुनेगरी सम्झौता भएको सनराइज ड्राइभिङका अध्यक्ष वसन्त भट्टचनले जानकारी दिए।      ट्रायल दिने क्रममा बसका लागि ७०० रूपैयाँ लिने गरिएकामा १८९, मिनीबसका लागि पहिला ६०० रूपैयाँ लिने गरिएकामा अब १२४ र ट्याक्टरका लागि ५०० रूपैयाँ लिने गरिएकामा अब ८९ रूपैयाँ मात्र शुल्क लाग्नेछ। यातायात व्यवस्था कार्यालय सवारी चालक अनुमतिपत्र र सनराइज ड्राइभिङअन्तर्गतको कुसुम सप्लायर्सबीच गत २३ पुसमा सम्झौता भएको हो। नयाँ शुल्कमा ट्रायलमा उपलब्ध हुने गाडी नयाँ विशेषतासहितका हुने बताइएको छ। यसअगाडि पुराना मोडलका गाडीबाट ट्रायल दिनुपर्ने बाध्यता अब हट्नेछ। युरो मापदण्डका २०१९ मोडलका गाडी ट्रायलमा राखिनेछ।      पावर स्टेरिङ, एसी, पावर विन्डोज, एबीएस एण्ड इबिडी सिस्टम, एयर ब्याग, ८०० सिसी क्षमताको इन्जिन, ग्राउण्ड किलियरेन्स १८५ सिसी, व्याक सेन्सरलगायतका विशेषता भएका गाडी ट्रायलमा राखिने बताइएको छ। यातायात व्यवस्था कार्यालय कास्कीका सूचना अधिकृत भरतराज काफ्लेले बोलपत्र आह्वानबाट भएको यस कार्यले सेवाग्राहीलाई राहत हुने बताए। उनले भने, “पहिला पुराना मोडलका गाडी थिए, अब नयाँ गाडीबाट ट्रायल दिन पाइनेछ साथै ट्रायल शुल्क घटेको छ, यसबाट उपभोक्ता लाभान्वित हुनेछन्।” रासस