प्रतिनिधि सभाको आजको बैठकबाट नयाँ सभामुख
<p>काठमाडौं। प्रतिनिधि सभाको आज दिउँसो ३ बजे तय गरिएको बैठकले नयाँ सभामुख चयन गर्दैछ।</p>
<p>संसद सचिवालयमा कार्यरत एक महिला कर्मचारीलाई बलात्कारको अभियोगसँगै तत्कालीन सभामुख कृष्णबहादुर महराले राजीनामा दिएसँगै प्रतिनिधि सभा सभामुखविहीन छ।</p>
<p>गत असोजदेखि सभामुखविहीन रहेको प्रतिनिधिसभाले आज दिउँसो बोलाइएको बैठकसँगै औपचारिक सभामुख चयनको प्रक्रिया पुरा हुने संसद सचिवालयले जनाएको छ। </p>
<p>सभामुखका लागि सत्तारुढ नेकपाका तर्फबाट अग्‍निप्रसाद सापकोटाको मात्रै उम्मेदवारी परेकाले उनी निर्विरोध निर्वाचित हुने निश्‍चित छ।</p>
<p>ज्येष्ठ सदस्यको हैसियतमा आजको बैठक पनि महन्थ ठाकुरले सञ्‍चालन गर्ने छन्।</p>
<p>बैठकमा प्रस्तावक सुवासचन्द्र नेम्वाङले उम्मेदवारीको प्रस्ताव पेस गर्ने र प्रस्तावमा समर्थकहरु नेकपाका देव गुरुङ्ग र ओनसरी घर्ती तथा राजपाका लक्ष्मणलाल कर्णले समर्थन गर्ने छन्।</p>
<p>आज बस्‍ने बैठकमा प्रस्तावक र समर्थकको तर्फबाट पालैपालो बोलेपछि अध्यक्ष ठाकुरले एकल उम्मेदवारी परेकाले सापकोटा सभामुखमा निर्वाचित भएको घोषणा गर्नेछन्।</p>
<p>ठाकुरले सँगसँगै नवनिर्वाचित सापकोटालाई बधाइ दिँदै आजको बैठक अन्त्य हुने संसद सचिवालयका सञ्‍चार विज्ञ शेखर अधिकारीले देखापढीलाई बताए।</p>
<p>यसैबिच वरिष्ठ अधिवक्ता दिनेश त्रिपाठीले प्रतिनिधि सभाको सभामुखमा अग्निप्रसाद सापकोटालाई निर्वाचित गर्ने प्रक्रिया रोक्न माग गर्दै सर्वोच्च अदालतमा दायर गरेको रिटमा आजै सुनुवाइ हुँदैछ।</p>
<p>त्रिपाठीले १० माघमा दायर गरेको रिटमाथि सर्वोच्च अदालतले पेसी तोकेको हो।</p>
<p> </p>
<p> </p>
<p> </p>
प्रतिक्रिया दिनुहोस्
.jpg)
