अरुण तेस्रो आयोजनाको विद्युत गृहमा बम विस्फोट
<p>काठमाडौं। संखुवासभामा निमार्णाधिन ९०० सय मेगावाटको अरुण तेस्रो जलविद्युत् आयोजनाको विद्युत गृहमा नेत्रविक्रम चन्द नेतृत्वको नेपाल कम्युनिष्‍ट पार्टीले बम विस्फोट गराएको छ।</p>
<p>चन्द समूहको एक समूहले चिचिला र मकालु गाउँपालिकाबीचको पुवाखोला केराबारी विद्युत गृह निर्माणस्थलको बन्दै गरेको कोलोनीमा प्रेसर कुकर बम विस्फोट गराएका हुन्।</p>
<p>गएराति साढे १० बजे गराइएको विस्फोटबाट पावर हाउस निर्माणको भारतीय ठेकेदार कम्पनी पट्टेल इन्जिनियर्सको नयाँ कोलोनीको ५०० केभी जेनेरेटरमा क्षति पुगेको संखुवासभाका सहायक प्रमुख जिल्ला अधिकारी मोहनमणि घिमिरेले बताए।</p>
<p>बम विस्फोटबाट निर्माणाधिन कोलोनीको गारोमासमेत क्षति पुगेको छ। त्यहाँ भारतीय प्राविधिक र कर्मचारी टोली बस्दै आएको छ।</p>
<p>बम विस्फोटलगत्तै आयोजनास्थल नजिकै सुरक्षार्थ खटिएको नेपाली सेना घटनास्थलमा परिचालन गरिएको छ।</p>
<p>चन्द समूहको कोशी सगरमाथा ब्यूरो स्रोतले बम विस्फोट आफूहरुले गराएको देखापढीसँग बताएको छ।</p>
<p>"खाँदबारीबाट इन्सपेक्टरको कमाण्डमा नेपाल प्रहरी र सशस्त्र प्रहरीको संयुक्त टोली त्यसतर्फ पठाएका छौं।</p>
<p>खोजी तथा थप अनुसन्धानको कामलाई तीब्रता दिएका छौं", सहायक प्रजिअ घिमिरेले जानकारी दिए।</p>
<p>यसअघि पनि चन्द समूहले पटकपटक अरुण तेस्रो जलविद्युत आयोजनास्थलमा बम विस्फोटलगायतका गतिविधि गरी अवरोध पुर्‍याउँदै आएको थियो।</p>
प्रतिक्रिया दिनुहोस्
.jpg)
