नेकपा केन्द्रीय कमिटी बैठक आजदेखि, यी छन् अजेण्डा
<p>काठमाडौं। सत्तारूढ नेपाल कम्युनिष्ट पार्टी (नेकपा) को केन्द्रीय कमिटी बैठक आज बिहान ११ बजेदेखि बस्दैछ।</p>
<p>तत्कालीन नेकपा एमाले र नेकपा माओवादी केन्द्रको एकीकरणबाट गठित नेकपाको केन्द्रीय कमिटी बैठक २१ महीनापछि बस्‍न लागेको हो।</p>
<p>यसअघि नेकपाको पहिलो केन्द्रीय कमिटी बैठक ३ जेठ २०७५ मा बसेको थियो।</p>
<p>बैठक अहिलेलाई २० माघसम्मलाई निर्धारण गरिए पनि अजेण्डाको छलफलमा लाग्ने समयले बैठक लम्बिन सक्ने गरी तयारी गरिएको नेकपा केन्द्रीय कार्यालय सचिव ईश्वरी रिजालले बताए।</p>
<p>उनले बैठकमा सहभागी हुन विभिन्न जिल्लाबाट केन्द्रीय सदस्य काठमाडौं आइसकेको र सम्पूर्ण व्यवस्थापकीय काम पूरा भएको जानकारी दिएका छन्।</p>
<p>नेकपा प्रचार विभाग उपप्रमुख सूर्य थापाका अनुसार राष्‍ट्रिय सभा गृहमा तय गरिएको बैठकमा अध्यक्ष एवं प्रधानमन्त्री केपी शर्मा ओलीले उद्घाटन मन्तव्य व्यक्त गर्ने कार्यसूची छ।</p>
<p>प्रधानमन्त्री निवास बालुवाटारमा १४ माघ साँझ बसेको नेकपा सचिवालय बैठकले केन्द्रीय कमिटी बैठकमा पेस गर्ने विभिन्‍न छ वटा अजेण्डा तय गरेको प्रवक्ता नारायणकाजी श्रेष्‍ठले बताए।</p>
<p>बैठकको शुरुमा शहीदप्रति श्रद्धाञ्जली र मौनधारण हुनेछ।</p>
<p>बैठक प्रारम्भसँगै प्रधानमन्त्रीले सरकारको काम र समसामयिक विषयमा सम्बोधन गर्नेछन्।</p>
<p>प्रधानमन्त्री ओलीको सम्बोधनपश्चात अध्यक्ष पुष्पकमल दाहालले अध्यक्षद्वयको तर्फबाट राजनीतिक प्रतिवेदन पेश गर्ने छन्।</p>
<p>महासचिव विष्णु पौडेलले सांगठनिक तथा विधान प्रतिवेदन पेश गर्ने छन् भने प्रदेश अध्यक्षहरुले आ-आफ्नो प्रदेशको रिपोर्टिङ गर्नेछन्।</p>
<p>राजनीतिक तथा सांगठानिक प्रतिवेदनमा छलफल गर्न १५ वटा समूह बनाइएको छ।</p>
<p>अंग्रेजी वर्णानुक्रमअनुसार समूह सदस्य चयन गरिएको बताइएको छ।</p>
<p>सो समूह धुम्बाराहीस्थित नेकपाको केन्द्रीय कार्यालय र बैठकस्थलमा छलफलमा जुट्ने छन्।</p>
प्रतिक्रिया दिनुहोस्
.jpg)
