टोखा-छहरे सुरुङमार्गको प्रारम्भिक अध्ययन सकियो
<p>काठमाडौं। चिनियाँ टोलीले काठमाडौंको टोखादेखि नुवाकोटको छहरे जोड्ने सुरुङमार्गको प्रारम्भिक अध्ययन सकेको छ।</p>
<p>नौ जनाको टोलीले करीब एक महीना लगाएर सुरुङको अध्ययन गरेको थियो। अध्ययन टोली चीन फर्किसकेको छ।</p>
<p>चैतसम्म टोलीले चीन सरकारलाई अध्ययन प्रतिवेदन बुझाउने भौतिक पूर्वाधार तथा यातायात मनत्रालयअन्तर्गत विकास सहायता कार्यान्वयन महाशाखा प्रमुख अर्जुनजंग थापाले जानकारी दिए।</p>
<p>“प्रतिवेदन बुझाइसकेपछि थप अध्ययनका लागि अर्को टोली आउनेछ”, उनले भने, “त्यसपछि समझदारीपत्रमा हस्ताक्षर गरिन्छ। त्यसकै आधारमा टोलीले पूर्वसम्भाव्यता अध्ययन गर्नेछ।”</p>
<p>प्रारम्भिक अध्ययनको क्रममा टोलीले साइट अवलोकन, डाटा संकलन, गल्छी र बालाजु सडकको अवलोकन गरेको थियो।</p>
<p>उक्त क्षेत्रमा पर्ने सबै बस्ती र पहाडको सर्भे गरिएको छ। शुरूमा सुरुङको दूरी सात किमि हुने भन्ने थियो। तर, चार किमि हुन सक्ने प्रारम्भिक अध्ययनका क्रममा जानकारी गराएको छ।</p>
<p>“लागतको कुरा भने आइसकेको छैन, रिपोर्ट आएपछि थाहा हुन्छ”, थापाले भने।</p>
<p>यो खण्डमा सुरुङ बनाउनुको कारण रसुवागढी सडकको दूरी छोट्याउनु रहेको आजको कान्तिपुर दैनिकमा समाचार छ।</p>
<p>“सुरुङ निर्माण भएपछि करीब १२ किमि दूरी घट्नेछ”, थापाले भने, “अहिले रसुवागढी–स्याफ्रुबेंसी–धुन्चे पुग्छौं, अब धुन्चे नपुगी रसुवागढीबाट स्याफ्रुबेसी–मैलुङ दोभान हुँदै विदुर आइनेछ।”</p>
प्रतिक्रिया दिनुहोस्
.jpg)
