केन्द्रीय कमिटीमा दिइने जवाफबारे छलफल गर्न नेकपा सचिवालय बैठक जारी
<p>काठमाडौं। केन्द्रीय कमिटी बैठकमा सदस्यहरुले उठाएका प्रश्‍न तथा सुझावको सम्बोधनबारे छलफल गर्न सत्तारुढ नेपाल कम्युनिष्ट पार्टी (नेकपा) को सचिवालय बैठक जारी छ।</p>
<p>प्रधानमन्त्री निवास बालुवाटारमा बसिरहेको बैठकमा केन्द्रीय कमिटी बैठकमा प्रस्तुत राजनीतिक, सांगठनिक प्रतिवेदनमाथि सदस्यहरूले उठाएका प्रश्न तथा सुझावमा नेतृत्वले दिने जवाफबारे छलफल भइरहेको छ।</p>
<p>"सचिवालयले निकाल्ने निष्कर्षको आधारमा आजको बैठकमा कसले के जवाफ दिने भन्‍ने टुंगो लाग्‍नेछ", नेकपाका उपप्रमुख सूर्य थापाले <em>देखापढी</em>सँग भने।</p>
<p>सचिवालय बैठक बस्‍नुअघि नेकपा अध्यक्षद्वय प्रधानमन्त्री केपी शर्मा ओली र पुष्पकमल दाहालबीच छलफल भएको छ।</p>
<p>राष्ट्रियसभागृहमा १५ माघबाट जारी बैठकमा अध्यक्षद्वयको राजनीतिक प्रतिवेदन, महासचिव विष्णुप्रसाद पौडेलको सांगठनिक प्रतिवेदन, विधान संशोधन प्रस्तावमाथि समूहगत छलफलपश्‍चात सबै समूह नेताहरूले सुझाव प्रस्तुत गरिसकेका छन्।</p>
<p>बैठकमा पेश गरिएका अजेण्डाहरूबारे छलफल गर्न १५ वटा समूह बनाइएको थियो।</p>
<p>आजको बैठक दिउँसो १ बजेदेखि शुरू हुनेछ। केन्द्रीय कमिटी बैठक सम्भवतः आजै सकिनेछ। </p>
प्रतिक्रिया दिनुहोस्
.jpg)
