Others

गृहपृष्ठ

नेकपाले महरालाई भन्यो– सभामुख र सांसद दुवै पदबाट राजीनामा देऊ भर्खरै प्रधानमन्त्री निवास बालुवाटारमा सकिएको नेकपा सचिवालयकाे आकस्मिक बैठकले तत्काल राजीनामा गरेर छानबिन प्रक्रियालाई सघाउन निर्देशन दिएको हो ।  नेकपा सचिवालयका एक सदस्यले आज बिहान अध्यक्षद्वय  केपी शर्मा ओली र पुष्पकमल दाहालबीच भएको छलफलअनुसार सचिवालयको आकस्मिक बैठक बोलाइएको र बैठकले राजीनामा गर्न निर्देशन दिएको देखापढीलाई बताए । “यति गम्भीर आरोप लागिसकेपछि तत्काल सभामुख र सांसद दुवै पदबाट राजीनामा गरेर छानबिनलाई सघाउनुपर्छ भन्ने पार्टीको निर्णय हो, त्यहीअनुसार उहाँलाई निर्देशन दिइएको छ”, ती सदस्यले भने । संसद सचिवालयमै कार्यरत एक महिला कर्मचारीले सभामुख महरा आफ्नो डेरामै आएर बलात्कार प्रयास गरेको आरोप लगाएकी थिइन् । रक्सी सेवन गरेर बलात्कार प्रयास गरेको र त्यसक्रममा आफूमाथि हातपात तथा कुटपिट समेत गरेको उनको आरोप थियो । १२ असोज साँझको सो घटनापछि उनले १३ असोजमा विभिन्न सञ्चारमाध्यममार्फत् घटना सार्वजनिक गरेकी थिइन् । यो प्रकरण सार्वजनिक भएपछि आजै बिहान प्रधानमन्त्री एवं नेकपाका अध्यक्ष केपी शर्मा ओली र अर्का अध्यक्ष पुष्पकमल दाहालबीच छलफल भएको थियो । त्यसैगरी, ओली, दाहाल, नेकपाका नेताहरु विष्णुप्रसाद पौडेल, सुवासचन्द्र नेम्वाङबीच पनि बालुवाटारमै छलफल भएको थियो । त्यसक्रममा नेताहरु महराले राजीनामा गर्नुपर्ने  निक्र्यौलमा  पुगेका थिए । लगत्तै नेकपा केन्द्रीय सचिवालयको आकस्मिक बैठक बोलाइएको थियो । महरा दाङ क्षेत्र नम्बर २ बाट निर्वाचित प्रतिनिधि सभाका सदस्य हुन् ।  पढ्नुहाेस्: <a href="https://www.dekhapadhi.com/news/619">सभामुखमाथि छानबिन हुनुपर्छ, दोषी भए आमनागरिक सरह कारबाही पनिः गगन थापा</a> <a href="https://www.dekhapadhi.com/news/616">साझा पार्टीद्वारा सभामुख महराको राजीनामा माग</a> <a href="https://www.dekhapadhi.com/news/610">सत्तारुढ नेकपाको आकस्मिक सचिवालय बैठक बस्दै</a> <a href="https://www.dekhapadhi.com/news/600">महरा फेरि विवादमा, बहालवाला सभामुखमाथि बलात्कारको आरोप</a>