कांग्रेस नेता सिंहकाे आरोप- 'सरकार राजनीतिकरूपमा पूर्वाग्रही भयाे'
<p>चितवन। नेपाली कांग्रेसका नेता प्रकाशमान सिंहले सरकारले राजनीतिकरूपमा पूर्वाग्रही भएको आरोप लगाएका छन्। </p>
<p>चितवनमा पत्रकारसँग कुराकानी गर्दै उनले सरकारले ललिता निवासको जग्गा प्रकरणमा तत्कालीन प्रधानमन्त्री र जग्गाधनी पूर्जा भएका व्यक्तिलाई उन्मुक्ति दिएर फाइल अगाडि बढाउनेलाई मुद्दा दायर गरेको बताए।</p>
<p>“मन्त्रिपरिषद्को सर्वोच्च कमान्डर प्रधानमन्त्री हुन्छ, त्यहाँबाट हुने कुनै पनि निर्णयमा प्रधानमन्त्रीको भूमिका महत्त्वपूर्ण हुने भएकाले यसमा तत्कालीन प्रधानमन्त्रीलाई जोगाउन खोजिएको छ”, सिंहले भने, “अख्तियार दुरुपयोग अनुसन्धान आयोग सरकारबाट प्रभावित भयो र जग्गा हुनेलाई कारबाही गर्न डरायो।”</p>
<p>तत्कालीन मन्त्री मात्रै होइन, प्रधानमन्त्री र जग्गाधनी पनि त्यतिकै दोषी भएकाे उनकाे भनाइ छ। उनीहरूलाई पनि कारबाही हुनुपर्ने कांग्रेसकाे माग रहेकाे सिंहले बताए।</p>
<p>नेता सिंहले यसैका लागि कांग्रेसले संसद् अवरुद्ध गरेको स्पष्ट पार्दै अख्तियारले राजनैतिक आग्रहपूर्वाग्रहबिना नै स्वतन्त्ररूपमा छानबिन गर्नुपर्नेमा जोड दिए।</p>
<p>फरक प्रसङ्गमा उनले कांग्रेसले १४औं महाधिवेशनका लागि तयारी शुरू गरेको बताए। महाधिवेशनको मिति तय भइसकेको अवस्थामा यसलाई स्वतन्त्र र निष्पक्ष बनाउनका लागि क्रियाशील सदस्यता छानबिनका लागि समिति बनाएर अघि बढेको उनले बताए। <em>रासस</em></p>
प्रतिक्रिया दिनुहोस्
.jpg)
