व्यस्त सडकमै कार निर्बाध पार्किङ, गरीबका साइकल र ठेला उठाएर लिलामी
<p>काठमाडौं। यातायात व्यवस्था चुस्त बनाउन विस्तार गरिएका राजधानीका सडक पार्किङस्थलमा परिणत भएका छन्।</p>
<p>मुख्य सडक र फुटपाथमै पार्किङ गरिएका निजी गाडी र मोटरसाइकललाई बेवास्ता गर्ने महानगरीय प्रहरीले गरीबका ठेला, साइकल र विभिन्न सामग्री जफत गरेर लिलामी नै गरिदिन्छ।</p>
<p>काठमाडौं महानगरपालिकाका भित्री सडक, करिडोर र सडक पेटीमा ठेला गाडी राखेर सामान बिक्री गरेको भेटेमा महानगर र ट्राफिक प्रहरीका संयुक्त टोलीले जफत गर्छन्।</p>
<p>ती सामग्री सड्ने, बिग्रने भए जरिवाना तिराएर छाड्ने र नसड्ने सामग्रीहरू (नाङ्लोदेखि, साइकल, ठेलागाडा तथा लत्ताकपडा) भने लिलामी गर्दै आएको छ।</p>
<p>उपत्यकाका व्यस्त बजारमै यस्ता कैयौँ सडक छन्, जहाँ नो पार्किङको बोर्ड राखिएको छ, तर त्यहाँ दिनभर सवारी पार्किङ हुन्छन् ।</p>
<p>‘नो पार्किङ’ स्थलमा पार्किङ गरेका सवारी उठाउन भने महानगर प्रहरी मुस्किलले पुग्छ।</p>
<p>तर, गरीबका ठेलागाडा र रिक्सा उठाउन भने छिट्टै पुग्छ।</p>
<p>जफत भएका ठेला गाडी र रिक्सा लिलामी हुन्छन् तर, महँगा र चम्किला गाडी ट्राफिकले जरिवाना लिएर सहजै छाडिन्छन्।</p>
<p>महानगरपालिकाले दुई वर्षअघि देखि अव्यवस्थित पार्किङ गरिएका सवारीसाधन र सामानहरू जफत गर्न थालेको हो ।</p>
<p>काठमाडौं महानगरपालिकाका नगर प्रहरी प्रमुख धनपति सापकोटाले सडक र पेटीमा सामग्री राखेको पाइएमा जफत गरी लिलाम गर्दै आएको बताए।</p>
<p>आजको नयाँ पत्रिकाका अनुसार महानगरपालिकाले जफत गरिएका सड्ने र गल्ने सामग्री भए जरिवानापछि फिर्ता गर्ने र नसड्ने सामान लिलाम गर्दै आएको छ।</p>
<p>उपत्यकामा सवारी जामका धेरै कारणमध्ये अव्यवस्थित पार्किङ पनि मुख्य रहेको महानगरीय ट्राफिक प्रहरी महाशाखाका प्रवक्ता एसपी जीवनकुमार श्रेष्ठ बताउँछन्।</p>
प्रतिक्रिया दिनुहोस्
.jpg)
