स्वास्थ्य मन्त्रालयले भन्यो- ‘कोरोना संक्रमितको उपचार गर्न १४७ बेड तयारी अवस्थामा छ’
<p>काठमाडौं। स्वास्थ्य तथा जनसंख्या मन्त्रालयले नोबेल कोरोना भाइरस संक्रमितको उपचारका लागि १४७ बेडहरू तयारी अवस्थामा राखिएको जनाएको छ।</p>
<p>मन्त्रालयका स्वास्थ्य आपतकालीन परिचालन केन्द्रका सहप्रवक्ता सागर दाहाललका अनुसार उपत्यकामा रहेका ३६ वटा अस्पतालमा उपचारको व्यवस्था मिलाइएको छ।</p>
<p>“नोबेल कोरोना भाइरसको लक्षण फेला परेमा पहिले टेकुस्थित शुक्रराज ट्रपिकल तथा सरुवा रोग अस्पताल र ललितपुरको पाटन अस्पतालमा लगिनेछ” उनले भने, “त्यसपछि उपत्यकामा रहेका ६ वटा हब अस्पताल र अन्य स्याटेलाइट अस्पतालमा व्यवस्था गरिनेछ।”</p>
<p>यसका लागि भोलि, २८ माघमा छलफलका लागि बोलाइएको समेत उनले जानकारी दिए।</p>
<p>चीनबाट ल्याउने विद्यार्थीहरूका लागि विशेष प्रोटोकल बनाएर सुरक्षितरूपमा राख्न लागिएको मन्त्रालयले जनाएको छ। त्यसका लागि आज इपिडेमियोलोजी एण्ड डिजिज कन्ट्रोल डिभिजनले कर्मचारीहरूलाई विशेष तालिम दिएको छ।</p>
<p>चीनबाट ल्याइएका विद्यार्थीहरूलाई राखिने क्वारेन्टाइनमा खटाइने स्वास्थ्यकर्मीहरू, कर्मचारीहरू, एम्बुलेन्सका कर्मचारी, एअरपोर्टमा रहने कर्मचारी, जहाजमा रहने कर्मचारी सबैलाई अपनाउनुपर्ने सुरक्षाका विषयमा तालिम दिइएको मन्त्रालयको भनाइ छ।</p>
<p>त्यस्तै काठमाडौं उपत्यकामा वीरेन्द्र सैनिक अस्पताल, टिचिङ अस्पताल महाराजगंज, वीर अस्पताल, सिभिल अस्पताल, पाटन अस्पताल, भक्तपुर अस्पताल हब अस्पताल हुन् भने टेकुस्थित शुक्रराज ट्रपिकल एण्ड सरुवारोग अस्पताल स्याटेलाइट अस्पताल हो।</p>
प्रतिक्रिया दिनुहोस्
.jpg)
