दैलेखमा नौ जनामा मलेरिया भेटियो
<p>दैलेख। दैलेखमा नौ जना मलेरियाका बिरामी भेटिएका छन्।</p>
<p>रोजगारीका लागि भारत गएका मानिस फर्किएसँगै लामखुट्टेबाट सर्ने मलेरिया रोग देखापरेको स्वास्थ्य कार्यालयले जनाएको छ।</p>
<p>यो रोगबाट पाँच वर्षीय बालकसमेत संक्रमित छन्।</p>
<p>जिल्लामा उपचार हुन नसकेपछि ती बालकलाई कान्ति बाल अस्पताल काठमाडौँमा थप उपचारको लागि लगिएको बताइएको छ।</p>
<p>मलेरियाका बिरामी दैलेख क्षेत्र-२ को दुल्लु नगरपालिका, आठबिस नगरपालिका, क्षेत्र नं १ को महावु गाउँपालिका र डुङ्गेश्वर गाउँपालिकाबाट भेटिएको हो।</p>
<p>रोगको संक्रमण अन्यत्र फैलिन नदिनका लागि सतर्कता अपनाइएको स्वास्थ्य सेवा कार्यालय प्रमुख डा. निराजन पन्तले बताए।</p>
<p>जिल्ला अस्पतालका वरिष्ठ ल्याव असिस्टेन्ट टेकबहादुर भण्डारीले उपचारका लागि अस्पताल आएका चार जना र उपचारको क्रममा बाहिर गएका पाँच जनामा मलेरिया देखिएको जानकारी दिए।</p>
<p>कोही एक जनामात्र मलेरिया बिरामी भेटिएको अवस्थामा तत्काल निगरानीमा राखी निःशुल्क उपचार गर्नुपर्ने साथै बिरामीका कारण परिवार र छिमेकीमा सर्नबाट रोक्न विशेष स्वास्थ्यकर्मी टोलीबाट जाँच गर्नुपर्ने प्रावधान छ। <em>रासस</em></p>
प्रतिक्रिया दिनुहोस्
.jpg)
