ठाकुर ज्ञवाली प्रहरी महानिरीक्षक नियुक्त हुँदै
<p>काठमाडौं। नेपाल प्रहरीको नयाँ महानिरीक्षक (आईजीपी) मा ठाकुर ज्ञवाली नियुक्त हुने भएका छन्।</p>
<p>हाल प्रदेश १ प्रहरी कार्यालय प्रमुख रहेका प्रहरी नायव महानिरीक्षक (डीआईजी) ज्ञवालीलाई अहिले केहीबेरमा बस्ने मन्त्रिपरिषद बैठकले नयाँ प्रहरी प्रमुख बनाउने निर्णय गर्नेछ।</p>
<p>प्रधानमन्त्री निवास बालुवाटारमा मन्त्रिपरिषद् बैठकको तयारी हुँदैछ।</p>
<p>प्रहरी नियमावलीको ३० वर्षे सेवा अवधिसम्बन्धी प्रावधानका कारण आईजीपी सर्वेन्द्र खनालले आजदेखि अवकाश पाउँदैछन्।</p>
<p>प्रहरी नियमावलीको यही प्रावधानलाई निरन्तरता दिने वा नियमावली संशोधन गरेर हटाउने भन्नेबारे टुंगोमा पुग्न नसक्दा २७ माघको मन्त्रिपरिषद् बैठकले यसबारे निर्णय गर्न सकेको थिएन। </p>
<p>नियमावली संशोधन गरेर ३० वर्षे सेवाअवधिको प्रावधान हटाइएको भए वर्तमान आईजीपी खनालले नै निरन्तरता पाउने वा उनको व्याचका एआईजीमध्येबाट नयाँ आईजीपी बन्ने सम्भावना रहन्थ्यो।</p>
<p>नियमावली फेरिने सम्भावना नरहेकाले खनालको व्याचका एआईजी र डीआईजीहरू सबैले एकसाथ अवकाश पाउँदैछन्। र, त्यसपछि कायम रहने डीआईजीमध्येबाट बरिष्ठताका आधारमा ज्ञवालीलाई आईजीपी बनाउन लागिएको हो।</p>
<p>“आईजीपीबारेको अन्योल अब टुंगिएको छ, आजै यसबारे निर्णय हुँदैछ”, मन्त्रिपरिषद कार्यालय स्रोतले <em>देखापढी</em>सँग भन्यो।</p>
<p>स्रोतका अनुसार प्रधानमन्त्री केपी शर्मा ओलीले ज्ञवालीको फाइल टिप्पणी उठाउन मुख्यसचिव लोकदर्शन रेग्मीलाई निर्देशन दिइसकेका छन्।</p>
<p>आईजीपी नियुक्त हुने भएपछि ज्ञवाली अहिले केहीबेरेमा विराटनगरबाट काठमाडौं आइपुग्दैछन्। नियुक्त भएपछि ज्ञवाली आउँदाे असारसम्म आइजीपी रहनेछन्। </p>
प्रतिक्रिया दिनुहोस्
.jpg)
