Others

गृहपृष्ठ

दैलेखमा पेट्रोल अन्वेषणको सर्वे ८० प्रतिशत सकियो दैलेख। पेट्रोलियम पदार्थ अन्वेषणको काम तीव्र गतिमा अगाडि बढिरहेको छ।  अहिले ‘कति परिमाणमा पेट्रोलियम पदार्थ छ र कुन स्थानमा बढी भण्डारणको सम्भावना छ’ भनेर जमिनभित्रको अवस्था पत्ता लगाउने महत्वपूर्ण भौगर्भिक (सेस्मिक) सर्वेको काम जारी रहेको छ। सर्वेको ८० प्रतिशत काम सम्पन्न भइसकेको जनाइएको छ।      तत्कालीन उद्योगमन्त्री मातृका यादवले दैलेखको नाभीस्थानबाट अन्वेषण कार्यको औपचारिक शुभारम्भ गरेका थिए। यहाँको पूर्वपश्चिम र उत्तरदक्षिणका विभिन्न भू–भागमा करीब २०० किलोमिटर क्षेत्र समेटेर १० स्थानमा शुरू गरिएको सर्वेका सात स्थानको काम सम्पन्न भइसकेको छ। करीब ४५ फिट मुनिसम्म खनिएको ‘होल’मा विस्फोटक पदार्थ राखेर कृत्रिम भूकम्पीय तरङ्ग उत्पन्न गरिएको र सोबाट प्राप्त भएको सबै सूचना सङ्कलन गर्ने कार्य सेस्मिक मिटरमा भइसकेको खानी तथा भूगर्भ विभागका अन्वेषण अधिकृत डा. गणेशनाथ त्रिपाठीले जानकारी दिए।      सर्वे सकिएपछि यसको अध्ययनका लागि तीन महीनाको समय लाग्ने छ। सो अवधिपछि धेरै सम्भावना भएको मुख्य भण्डारणको क्षेत्रमा पुनः करीब चार किलोमिटर जमिनमुनिको भू–भागमा मुख्य ड्रिलिङ गरिने र त्यसपछि कति परिमाणमा पेट्रोलियम पदार्थ छ भन्ने कुरा पत्ता लाग्ने उनले जानकारी दिए।      <blockquote> विदेशका अन्य भूभागमा गरिएका सर्वेलाई आधार मान्ने हो भने छिद्र देखिएका स्थान र ग्यास निस्किएका स्थानकै आसपासमा भण्डारण भेटिएकाले दैलेखको भूभागमा पनि भण्डारणको सम्भावना भएको अन्वेषण अधिकृत डा. त्रिपाठीले बताए। </blockquote> एउटा लाइनमा ४०० वर्गकिमी भूभाग समेटेर सर्वेको काम भइरहेको छ। दैलेखको पश्चिम भूभागमा गरिएको सेस्मिक सर्वेका लागि दुल्लु नगरपालिकामा क्याप निर्माण गरेर विज्ञहरूको समूह बसेका छन्। यस कार्यलाई यहाँका जनता र जनप्रतिनिधिले स्वागत गरेको छन्। सांसद रवीन्द्रराज शर्माले अन्वषेण कार्यले समृद्ध नेपाल बनाउने प्रधानमन्त्रीको लक्ष्यलाई सहयोग पुर्&zwj;याउने विश्वास व्यक्त गरे।       अन्वेषणको प्रक्रिया शुरू हुँदै गर्दा चिनियाँ प्राविधिक टोलीले सङ्कलन गरेका स्रोत र चट्टानको नमूना परीक्षणबाट उत्साहजनक नतिजा प्राप्त भएकाले दैलेखको भूभागमा ग्यास र पेट्रोलियम पदार्थ दुबै हुनसक्ने सम्भावना बढ्दै गएको छ। अन्वेषण कार्य सफल भए वर्तमान सरकारले शुरू गरेको ‘सुखी नेपाली, समृद्ध नेपाल’को परिकल्पना पूरा हुने आशा गरिएको छ।       विदेशका अन्य भूभागमा गरिएका सर्वेलाई आधार मान्ने हो भने छिद्र देखिएका स्थान र ग्यास निस्किएका स्थानकै आसपासमा भण्डारण भेटिएकाले दैलेखको भूभागमा पनि भण्डारणको सम्भावना भएको अन्वेषण अधिकृत डा. त्रिपाठीले बताए। दैलेखका धेरै स्थानमा जमिनमुनिबाट छिद्रका रूपमा हजारौँ स्थानमा पानीभित्र फोकाहरू भुलभुल गरेर आएको देखिन्छ। कतिपय स्थानमा ग्यास नै बलेको देखिएको छ। यसको विश्लेषण गर्ने हो भने पनि दैलेखको कुनै भूभागमा भण्डारण हुनसक्ने विज्ञहरूको भनाइ छ।  नरबहादुर रिजाल/रासस