महराविरुद्धको मुद्दाको अन्तिम सुनुवाइ जारी, आजै फैसला आउन सक्ने
<p>काठमाडौं। पूर्वसभामुख कृष्णबहादुर महराविरुद्धको मुद्दामा आज अन्तिम सुनुवाई भइरहेको छ।</p>
<p>जबरजस्ती करणी उद्योग मुद्दामा आज महराका तर्फबाट कानून व्यवसायीहरूले बहस गरिरहेका छन्।</p>
<p>जिल्ला अदालत काठमाडौंका मुख्य न्यायाधीश अम्मरराज पौडलको इजलासमा मुद्दाको अन्तिम सुनुवाइ भइरहेको हो।</p>
<p>२६ माघमा महराविरुद्धको मुद्दाको अन्तिम सुनुवाइ शुरू भएको थियो। सरकारी वकील कार्यालयको तर्फबाट भने यसअघि नै बहस सकिएको छ।</p>
<p>सरकारी वकील चन्द्रकान्त खनाल, उमाकान्त पौडेलसहित चारजनाले बहस गरिसकेका छन्।</p>
<p>बहस सकिएर अन्य कुनै आदेश गर्न नपर्ने भएमा आजै अन्तिम फैसला आउने काठमाडौं जिल्ला अदालतका श्रेस्तेदार आनन्दप्रसाद श्रेष्ठले <em>देखापढी</em>लाई बताए।</p>
<p>संसद सचिवालयमा कार्यरत एक महिलालाई जबर्जस्ती करणीको प्रयास गरेको आरोपमा महराविरुद्ध जिल्ला अदालतमा मुद्दा दायर भएको थियो।</p>
<p>अदालतले प्रारम्भिक सुनुवाईमा महरालाई पुर्पक्षका लागि थुनामा पठाउने आदेश गरेको थियो। जिल्ला अदालतको आदेशविरुद्ध महरा उच्च अदालत पाटन पुगेका थिए।</p>
<p>उच्च अदालतले पनि उनलाई जिल्लाको आदेश नै सदर गर्दै छाड्न मानेको थिएन्। उच्चको आदेशमा एक महीनाभित्रमा मुद्दाको अन्तिम किनारा लगाउन भनिएको थियो।</p>
<p>महराविरुद्ध जबरजस्ती करणी प्रयासमा पाँच वर्ष र सार्वजनिक पद धारण गरेको कसुरमा साढे दुई वर्षसहित साढे सात वर्ष कैद हुनुपर्ने भन्दै अभियोग दायर गरिएको छ।</p>
प्रतिक्रिया दिनुहोस्
.jpg)
