एमसीसी नेपालको हितमा छ: राप्रपा अध्यक्ष थापा
<p>रुपन्देही। राष्ट्रिय प्रजातन्त्र पार्टीका अध्यक्ष कमल थापाले अमेरिकाको मिलेनियम च्यालेञ्‍ज कर्पोरेशन (एमसिसी) आयोजना नेपालको हितमा रहेको बताएका छन्।</p>
<p>आज बुटवलमा पत्रकारसँगको कुराकानीमा उनले एमसीसीबारे नागरिकमा रहेको आशंका हटाउन सरकारले आधिकारिक धारणा बाहिर ल्याउनुपर्ने आवश्यकता औंल्याएका छन्।</p>
<p>“सम्झौताप्रति भ्रम उत्पन्न भएको छ, त्यो चिर्ने काम सरकारले गर्नुपर्छ", थापाले भने, “एमसीसी संसद्मा पारित हुने विषय ठूलो नभए पनि आधिकारिक धारणासहित कार्यान्वयनमा लैजानुपर्छ।"</p>
<p>“विगतमा अस्थिरताबाट जनता वाक्क भएका छन्। सरकार ढाल्ने कुरामा जनताको रुचि छैन”, अध्यक्ष थापाले भने, “जनतालाई स्थिर सरकार चाहिएको छ ।”</p>
<p>विगतको निर्वाचनमा भोग्नुपरेको पराजयबाट पाठ सिकेर कमजोरी हटाउँदै राप्रपालाई देशको अग्रणी पार्टीको रूपमा अघि बढाउने अभियानमा लागेको थापाले दाबी गरे।</p>
<p>आफ्नो पार्टीलाई हिन्दू राज्य र राजसंस्थासँग मात्रै जोडेर नहेर्न उनको आग्रह थियो। <em>रासस</em></p>
प्रतिक्रिया दिनुहोस्
.jpg)
