दमकमा ६४ अर्बको नेपाल-चीन मैत्री औद्योगिक पार्क निर्माण हुने
<p>काठमाडौं। प्रदेश १ स्थित झापाको दमकमा नेपाल-चीन मैत्री औद्योगिक पार्क परियोजना निर्माण हुने भएको छ। </p>
<p>परियोजना समझदारी पत्रमा नेपाल सरकार, लगानी बोर्डका प्रमुख कार्यकारी अधिकृत महाप्रसाद अधिकारी र विकासकर्ता कम्पनीको तर्फबाट दमक क्लिन इन्डष्ट्रियल पार्क प्रा.लि. का अध्यक्ष गोविन्द बहादुर थापााले हस्ताक्षर गरेका छन्।</p>
<p>१६ असोजमा भएको कार्यक्रममा उद्योग, वाणिज्य तथा आपूर्ति मन्त्री मात्रिकाप्रसाद यादवको समेत उपस्थिति थियो। </p>
<p>लगानी बोर्डको १७ साउन २०७६ मा बसेको ३९ औं बैठकले उक्त परियोजनाको लागि करिब ६४ अर्ब रूपैंयाको विदेशी लगानी स्वीकृत गरेको थियो।</p>
<p>बैठकले विस्तृत परियोजना प्रतिवेदन तयार गर्न दमक क्लिन इन्डष्ट्रियल प्रा.लि. लाई अनुमति दिने निर्णय गरेको थियो । </p>
<p>सार्वजनिक निजी साझेदारीमा निर्माण गरिने यस परियोजनामा ल्हासा आर्थिक तथा प्राविधिक विकास क्षेत्रको जींग–पींग संयुक्त निर्माण कम्पनी (जेपीजेसीसीपीडी) को लगानी रहनेछ। </p>
<p>परियोजना अन्तर्गत अत्याधुनिक औद्योगिक पार्क निर्माण, सञ्चालन र व्यवस्थापनको लागि डीपीआर तयार भएपछि परियोजना विकास सम्झौता गरेर निर्माण कार्य थालिने छ। </p>
<p>नेपालको रोजगारी, आर्थिक एवं सामाजिक विकासमा यस औद्योगिक क्षेत्रको निर्माणले योगदान पुग्ने ल्हासा नगरपालिकाका उपमेयर लीउ गुआङ मीनले विश्वास व्यक्त गरे। </p>
प्रतिक्रिया दिनुहोस्
.jpg)
