प्रधानमन्त्री जन्मदिन मनाउन जन्मघर तेह्रथुम जाँदै
<p>काठमाडौं। प्रधानमन्त्री केपी शर्मा ओली आफ्नो जन्मदिन मनाउन आज जन्मथलो तेह्रथुम जाँदै छन्।</p>
<p>प्रधानमन्त्री ओलीको आज ६९औं जन्मदिन हो।</p>
<p>११ फागुन २००८ मा तेह्रथुमको साविक इवा गाविस सल्ले (हाल आठराई गाउँपालिका-४) मा उनको जन्म भएको थियो।</p>
<p>ओलीको बाल्यकाल र किशोरावस्था तेह्रथुममै बितेको थियो। पछि उनको परिवार झापा बसाइँ सरेको हो।</p>
<p>बिक्री गरिसकेको पहाडको पुर्ख्यौली घर बाबुको आग्रहअनुसार प्रधानमन्त्री ओलीले केही समयअघि किनेर मर्मत सम्भार गरेर संरक्षण गरिएको छ।</p>
<p>आज प्रधानमन्त्रीले जन्मघरबाटै खुसीयाली साट्ने गरी विशेष कार्यक्रम तय गरिएको नेकपा तेह्रथुमका नेता तथा प्रदेश १ का सांसद तेजमान कन्दङ्वाले <em>देखापढी</em>लाई बताए।</p>
<p>आफ्नो जन्मदिनमा प्रधानमन्त्रीले आठराई गाउँपालिकाभरिका दुई हजार बालबालिकालाई शैक्षिक सामग्री वितरण गर्नुका साथै ज्येष्ठ नागरिकलाई कपडा वितरण गरि सम्मान गर्ने छन्।</p>
<p>प्रधानमन्त्री ओलीले तेह्रथुम आठराईदेखि मदन भण्डारीको जन्मथलो ढुंगेसाँघु जोड्ने सडकको शिलान्यास गर्ने छन्। त्यस्तै नेपाल बै‌कको उद्घाटन गर्ने कार्यक्रम छ।</p>
<p>पाँचथरको यासोकमा तमोर नदीबाट निकालिएको लिफ्टिङ खानेपानी आयोजनाको उद्घाटनपश्‍चात प्रधानमन्त्री ११ बजे तेह्रथुम पुग्ने कार्यक्रम रहेको कन्दङ्वाले बताए। </p>
प्रतिक्रिया दिनुहोस्
.jpg)
