संविधान संशोधनको लागि बनाइएको नेकपा कार्यदल विवादमा
<p>काठमाडौं। उपाध्यक्ष वामदेव गौतमलाई राष्ट्रिय सभामा लैजान उनले चाहेअनुसारै संविधान संशोधन गर्न गठन गरिएको कार्यदल सार्वजनिक भएपछि नेकपामा यसले विवाद निम्त्याएको छ।</p>
<p>गौतमले राष्ट्रिय सभा सदस्य पनि प्रधानमन्त्री बन्न पाउने संवैधानिक व्यवस्था भए मात्र आफू मनोनित हुन तयार रहने अडान राख्दै आएका छन्।</p>
<p>नेकपा सचिवालयले १० फागुनको सचिवालय बैठकले माधवकुमार नेपालको संयोजकत्वमा कार्यदल गठन गरेको छ। स्थायी कमिटी सदस्य सुवास नेम्बाङ र केन्द्रीय सदस्य खिमलाल देवकोटालाई सदस्य तोकिएको छ।</p>
<p>यो विषय गोप्य राख्ने र गोप्य रूपमै त्यसले काम गर्ने तय भएको थियो।</p>
<p>कार्यकारी अध्यक्ष पुष्पकमल दाहालको प्रस्तावमा उक्त निर्णय भएको सचिवालयका एक सदस्यलाई उद्धृत गर्दै अन्नपूर्ण पोष्टले समाचार लेखेको छ।</p>
<p>एक व्यक्तिलाई केन्द्रमा राखेर संविधान संशाधन गर्न खोजिएको भन्दै वरिष्ठ नेता नेपालकै समूहभित्र असन्तुष्टि देखिएको छ।</p>
<p>नेम्बाङले पनि आफू कार्यदलमा नबस्ने भन्दै असन्तुष्टि जनाएका छन्। आफू संविधान सभा अध्यष भएर जारी गरेको संविधान आफ्नै पहलमा संशोधन गराउन उनी इच्छुक छैनन्।</p>
<p>फलस्वरुप यो कार्यदल नजन्मिँदै विवादमा तानिएको हो।</p>
प्रतिक्रिया दिनुहोस्
.jpg)
