वडाध्यक्षकाे अनशनप्रति संसदीय दल र केन्द्रको समर्थन छः कांग्रेसका मुख्य सचेतक खाँण
<p>चितवन। नेपाली कांग्रेसका मुख्य सचेतक बालकृष्ण खाँणले माडी नगरपालिका-१ का वडाध्यक्ष कृष्ण पौडेलको आमरण अनशनप्रति पार्टी संसदीय दल र केन्द्रको समर्थन रहेको बताएका छन्।</p>
<p>भरतपुर अस्पतालमा उनलाई आज भेटेपछि प्रतिक्रिया दिँदै खाँणले सरकारले अविलम्ब उनको जीवनरक्षाका लागि पहल गरी माग सुनुवाइ गर्नुपर्ने बताए।</p>
<p>माडीका जनताको समस्या र पीडालाई मुखरित गर्ने र त्यसलाई राज्यले सम्बोधन गरोस् भन्ने उद्देश्यले पाैडेलको अनशन भएको भन्दै खाँणले संसद् पूर्णरूपमा चलेपछि यस विषयमा कांग्रेसले संसद्‍मा उठान गर्ने बताए। उनले भने, “जुन खालको कठिन अवस्था छ त्यसबाट उन्मुक्ति पाइयोस् भनेर अनशन बस्नुभएको छ, त्यसमा हाम्रो समर्थन छ।”</p>
<p>वडाध्यक्ष पौडेल ७ फागुनदेखि माडीका जनताको प्रत्यक्ष सरोकार राख्ने माग राखेर आमरण अनशनमा बसेका हुन्। उनको अवस्था गम्भीर भएपछि १२ फागुन बिहान भरतपुर अस्पतालको सघन उपचार कक्षमा राखेर उपचार थालिएको छ।</p>
<p>पौडेललाई भेट्न नेता खाँण यहाँ आएका हुन्। एक फरक प्रसङ्गमा खाँणले सेक्युरिटी प्रिन्टिङ प्रेसका विषयमा प्रधानमन्त्रीले सदनलाई जानकारी गराउनुपर्ने बताए। <em>रासस</em></p>
प्रतिक्रिया दिनुहोस्
.jpg)
