नेपथ्यको ‘लाम्पाते सुरती’ को लाईभ भिडिओ सार्वजनिक
<p>काठमाडौं। लोक रक ब्याण्ड नेपथ्यको चर्चित गीत ‘लाम्पाते सुरती’ को भिडिओ युट्युबमा आएको छ।</p>
<p>स्थापन कालमा ‘पप संगीत’ बाट सुरु भएको ब्याण्ड नेपथ्यलाई नयाँ पहिचानसहित ‘लोक रक ब्याण्ड’ मा रुपान्तरण गरेको एल्बम ‘रेशम’ मै समेटिएको यो गीतमा पोखरेली सर्जक सरुभक्तका शब्दहरु अटाएका छन्।</p>
<p>‘आज भोली के भयो के भयो<br />
कसले कसले स्वाट्ट यो मन छोयो<br />
खान्न म त लाम्पाते सुरति<br />
लाउँ कि नलाउँ जुग जाने पिरती’</p>
<p>रेशम एल्बमको शीर्ष गीत ‘रेशम’ सर्वाधिक चर्चामा आएता पनि धेरै श्रोताहरु ‘लाम्पाते सुरति’ लाई अब्बल ठहर गर्छन्।</p>
<p>“नेपथ्यको पाँचवटा सर्वोत्कृष्ठ गीतको सूची तयार पार्नुपरेमा म एकदेखि पाँच सम्मै ‘लाम्पाते सुरति’ लाई राख्छु, त्यसपछि छैठौं सूचीतिर मात्रै नेपथ्यका अरु गीतको गणना सुरु हुन्छ,” लेखक कुमार नगरकोटी भन्छन्। </p>
<p>यो गीतलाई पोखराका गन्धर्वहरुले भाका हालेर बेग्लै पाराले गाउँदै आएको हुनाले आफूले केटाकेटीमै सुनेको गायक अमृत गुरुङ बताउँछन् । “त्यसै भाकालाई माटोपानीको जग्गु भनिने इश्वर गुरुङ दाइले गितारको धुनमा मिसाएर असाध्यै मिठोसँग सुनाएका थिए,” अमृतले सम्झे ।</p>
<p>अमृतका अनुसार त्यतिबेला गीतको शब्द थियो–</p>
<p>‘घर त मेरो पातीले बारेको<br />
रक्सी मिठो ङोल्स्योले पारेको<br />
खान्न म त लाम्पाते सुरति<br />
लाउँ कि नलाउँ जुग जाने पिरती’</p>
<p>धुन मिठो भइकन पनि गीतको शब्द उति मन नपरेपछि त्यसैलाई लिएर पोखराकै लेखक सरुभक्तसँग गएर यस गीतको सुन्दर रुपान्तरण हुन पुगेको अमृत सुनाउँछन्।</p>
<p>“दाइले नयाँ शब्द तयार पारेपछि यो गीतै झलमल्ल बलेजस्तो भयो,” अमृत भन्छन् । त्यसको लगत्तै रेशम एल्बमको तयारी गर्दै गीतको रेकर्डिङ सुरु गरेको उनले बताए।</p>
<p>‘रेशम’ एल्बमको शिर्ष गीतको भिडियो सार्वजनिक भएसँगै लोकप्रियता हासिल गरेको थियो । एल्बमको अर्को चर्चित ‘लाम्पाते सुरती; भने भने दुइ दशकपछि श्रब्यदृश्यमा आएको छ ।</p>
<p>संसारभर ब्याण्डहरुले आफ्ना चलेका गीतहरुलाई ‘लाइभ रेकर्ड’ गरेर श्रब्यदृश्य संस्करण पुनः सार्वजनिक गर्ने प्रचलन अनुसार यसलाई पनि तयार पारिएको हो । गत वर्ष नेपथ्यले ‘नेपाल टुर’ गर्दाको संग्रहबाट यो भिडिओ तयार पारिएको हो ।</p>
<p><iframe frameborder="0" height="315" scrolling="no" src="https://www.youtube.com/embed/AlCZ0OM8i6c" width="560"></iframe></p>
<p>लाइभ कार्यक्रममा आधारित यस भिडिओले गायक अमृत गुरुङको दर्शकहरुसँग संवाद गर्ने मौलिक शैलीलाई पनि समेटेको छ ।</p>
<p>“प्रत्यक्ष कार्यक्रम हेर्दाको अनुभूति मिलोस् भनेर सक्दो प्रयास गरेका छौं,” नेपथ्यलाई प्रवद्र्धन गर्दै आएको नेपालयका किरणकृष्ण श्रेष्ठ भन्छन् ।</p>
<p>हिजोआज सांगीतिक एल्बमको प्रचलनले अर्थ गुमाउँदै गएको अवस्थामा नेपालयले यसका प्रत्येक सिर्जनाहरु आइट्युन, गुगलप्ले र स्पोटिफाइजस्ता ‘भर्चुअल स्टोर’ हरुका माध्यमबाट सार्वजनिक गर्दै आएको छ ।</p>
<p>त्यसबाहेक ब्याण्ड र उसका श्रोताहरुलाई नजिक्याउन युट्युब पनि एक प्रभावकारी माध्यम बन्दै गएको छ।</p>
<p> </p>
प्रतिक्रिया दिनुहोस्
.jpg)
