उत्तर कोरिया र अमेरिकाबीच स्टकहोममा वार्ता शुरु
<p>उत्तर कोरिया र अमेरिकी अधिकारीहरु उत्तर कोरियाली आणविक कार्यक्रमका विषयमा वार्ता गर्न आज स्वीडेनको स्टकहोम आइपुगेका छन्।</p>
<p>पछिल्लो समय उत्तर कोरियाले लगातार क्षेप्यास्त्र परीक्षण गरिरहेकै समयमा दुबै देशका वरिष्ठ अधिकारीहरु वार्ताका लागि भेला भएका हुन् ।</p>
<p>उत्तर कोरियाका किम म्योङ गिल र उत्तर कोरियाका लागि अमेरिकी राष्ट्रपति डोनाल्ड ट्रम्पका विशेष दूत स्टिफेन बाइगनले वार्ता टोलीको नेतृत्व गरेका छन्। </p>
<p>स्वीडेनकी विदेश मन्त्री आन लिन्डले अमेरिकी र उत्तर कोरियाली अधिकारीहरुले स्वीडेनलाई वार्तास्थल छनौट गरेकामा प्रसन्नता व्यक्त गरेकि छन्।</p>
<p>आणविक निःशस्त्रीकरण र शान्तिपूर्ण समाधानका लागि संवाद नै एकमात्र उपयुक्त विधि रहेको बताइन्।</p>
<p>उत्तर कोरियाली आणविक निःशस्त्रीकरणका विषयमा सन् २०१८ र यसै वर्षको जनवरीमा यस्तै किसिमको वार्ता स्वीडेनमा भएको थियो।</p>
<p>उत्तर कोरियाले गत १५ असोजमा पनि रकेट परीक्षण गरेको थियो ।</p>
<p>स्वीडेन प्रस्थान गर्नुअघि बेइजिङमा कुरा गर्दै उत्तर कोरियाली वार्ता टोलीका नेता किम म्योङ गिलले वार्ताप्रति आफूहरु निकै आशावादी रहेको बताएका छन् । </p>
<p>अमेरिकी राष्ट्रपति ट्रम्पले पनि उत्तर कोरियाले गरिरहेको सानातिना हतियार परीक्षणबाट अमेरिकालाई खासै प्रभाव नपर्ने बताउँदै वार्ताका लागि तयारी रहेको बताउँदै आएका थिए। <em>एएफपी /रासस</em></p>
प्रतिक्रिया दिनुहोस्
.jpg)
