पश्मिना र कफी उत्पादनमा एक अर्ब लगानी हुने, मूल्य श्रृंखला सुधारको परियोजना शुरू
<p>काठमाडौं। नेपालमा पश्मिना र कफी उत्पादन तथा त्यसको मूल्य श्रृंखलामा सुधार ल्याउने परियोजनाका लागि युरोपियन युनियनले करीब एक अर्ब रूपैयाँ सहयोग गर्ने भएको छ।</p>
<p>उद्योग, वाणिज्य तथा आपूर्ति मन्त्रालयसँगको साझेदारीमा नेपालको आर्थिक विकासका लागि क्षेत्रीय तथा विश्वव्यापी मूल्य श्रृंखलामा सुधार ल्याउन परियोजना कार्यन्वयन गर्न लागिएको अन्तर्राष्ट्रिय व्यापार केन्द्रले बताएको छ।</p>
<p>आज काठमाडौंमा एक कार्यक्रम आयोजना गरी उक्त परियोजनाको लागि ८ मिलियन यूरो (करीब एक अर्ब रूपैयाँ) लगानी हुने बताएको छ। अन्तर्राष्ट्रिय व्यापार केन्द्रले ५ मिलियन र उद्योग, वाणिज्य तथा आपूर्ति मन्त्रालय र नेपाल स्थित युरोपियन युनियनको कार्यालयले संयुक्त रूपमा ३ मिलियन खर्च गर्नेछन्।</p>
<p>उद्योग, वाणिज्य तथा आपूर्ति मन्त्रालयका सचिव वैकुण्ठ अर्यालले उक्त लगानीले नेपालमा कफी र पश्मिनाको उत्पादन बढाउने र अन्तर्राष्ट्रिय बजारमा व्यापार अभिवृद्धिमा सहयोग पुग्ने बताए।</p>
<p>क्षेत्रीय र विश्वव्यापी मूल्यश्रृंखलामा नेपाली उद्यामीहरुको सहभागिता बढाउने लक्ष्य परियोजनाको छ। परियोजनाले उद्योग वाणिज्य तथा आपूर्ति मन्त्रालय तथा निर्यात प्रवर्द्धन केन्द्रको क्षमता अभिवृद्धिमा पनि सहयोग गर्ने बताइएको छ।</p>
प्रतिक्रिया दिनुहोस्
.jpg)
