कोरोना भाइरसका कारण इरानमा २१० को मृत्यु
<p>लण्डन। कोरोना भाइरसको सङ्क्रमणबाट इरानमा कम्तीमा २१० जनाले ज्यान गुमाएको स्वास्थ्य अधिकारीहरुले शनिबार जानकारी दिएका छन्।</p>
<p>अधिकांश पीडितहरू राजधानी तेहरानका र शुरूमा भाइरस देखिएको कुम सहरका रहेका बताइएको छ। स्वास्थ्य मन्त्रालयले शुक्रबार सार्वजनिक गरेको सङ्ख्या भन्दा यो ६ गुणा बढी हाे।</p>
<p>शुक्रबार सरकारी अधिकारीहरुले कोरोना भाइरसबाट ३४ जनाको मृत्यु भएको जानकारी दिएका थिए। यसअघि कुमबाट निर्वाचित एक सांसदले अधिकारीहरूले वास्तविक अवस्था लुकाएको हुनसक्ने बताएका थिए र अमेरिकाले इरानले सूचना उपलब्ध नगराएको हुनसक्ने टिप्पणी गरेको थियो।</p>
<p>अमेरिकी विदेशमन्त्री माइक पोम्पेओले इस्लामिक गणतन्त्र इरानलाई सहयोगको प्रस्ताव राखिएको बताएका थिए।</p>
<p>इरानभित्र स्वास्थ्य सेवा प्रभावकारी नरहेको र इरानले देशभित्र के भइरहेको छ भन्ने जनकारी दिन अनिच्छा देखाएको पोम्पेओले बताएका थिए। इरानी विदेश मन्त्रालयका प्रवक्ता अब्बास मुसभीले सहायता उपलब्ध गराउने अमेरिकी प्रस्ताव अस्वीकार गरेका थिए। </p>
<p>हालसम्म विश्वमा ८३ हजारभन्दा बढी कोभिड-१९ का सङ्क्रमणका घटना प्रमाणित भएका छन्। इरानी अधिकारीहरूले कोभिड-१९ नियन्त्रणका लागि मानिसहरूलाई घरभित्रै बस्न, अन्तरक्रिया र आवतजावत नियन्त्रण गर्न, भेलाहरूमा सहभागी नहुन र व्यक्तिगत रूपमा अपनाउनुपर्ने सावधानीका उपाय मान्न सुझाव दिइरहेका छन्। शनिबारबाट देशभरका विद्यालयहरूमा कम्तीमा तीन दिन बिदा दिने निर्णय भएको छ।</p>
<p>तेहरानको नगर परिषद्का एक अधिकारीले कोरोना भाइरस सङ्क्रमितको सङ्ख्या केही हप्तामा १० देखि १५ हजार पुग्ने बताएका छन्।<strong><em> एएफपी</em></strong></p>
प्रतिक्रिया दिनुहोस्
.jpg)
