'बामदेव प्रकरण' पछिको निर्णय लिन नेकपा सचिवालय बैठक बस्दै
<p>काठमाडौं। बामदेव गौतमलाई राष्‍ट्रिय सभा सदस्यमा लैजाने निर्णयसँगै विकसित पछिल्लो घटनाक्रमबारे छलफल गर्न सत्तारुढ दल नेपाल कम्युनिष्‍ट पार्टी (नेकपा) ले आज सचिवालय बैठक बोलाएको छ।</p>
<p>प्रधानमन्त्री निवास बालुवाटारमा दिउँसो साढे ११ बजे सचिवालय बैठक तय गरिएको नेकपाका प्रचार विभाग उपप्रमुख सूर्य थापाले जानकारी दिए।</p>
<p>"पछिल्ला समसामयिक राजनीतिक विषयमा छलफल तथा आवश्‍यक निर्णय हुनेछ", थापाले <em>देखापढी</em>सँग भने।<br />
<br />
नेकपा सचिवालयको १४ फागुनमा बसेको बैठकले उपाध्यक्ष बामदेव गौतमलाई राष्ट्रिय सभा सदस्यमा मनोनित गर्न राष्‍ट्रपतिसमक्ष सिफारिसका लागि सरकारलाई अनुरोध गर्ने निर्णय गरेको थियो।</p>
<p>गौतमलाई राष्ट्रिय सभामा लैजाने निर्णयलगत्तै प्रधानमन्त्री एवं नेकपा अध्यक्ष केपी शर्मा ओली असन्तुष्ट देखिएका छन्।</p>
<p>अर्थमन्त्री डा. युवराज खतिवडालाई आफ्नो मन्त्रिपरिषद्मा निरन्तरता दिन चाहेका प्रधानमन्त्री ओली यहीकारण गौतमको प्रस्ताव कार्यान्वयन नगर्ने निर्क्योलमा पुगेको बताइन्छ।</p>
<p>अर्का अध्यक्ष पुष्पकमल दाहालले १६ फागुनमा चितवन पुगेर 'प्रधानमन्त्रीले नै बामदेवलाई राष्ट्रियसभामा सिफारिस गर्ने' बताएका थिए।</p>
<p>नेकपाभित्र नेताहरूबीच गौतमलाई राष्ट्रिय सभामा लैजाने र खतिवडालाई अर्थमन्त्रीमा निरन्तरता दिने दुवै विकल्पमा छलफल भइरहेकाले यही धारमा सचिवालयमा पनि छलफल हुनसक्ने एक नेताले बताएका छन्।</p>
<p>प्रधानमन्त्री ओलीले सचिवालयको प्रस्तावअनुसार गौतमलाई राष्ट्रिय सभामा मनोनयनका लागि राष्ट्रपतिसमक्ष सिफारिस गर्छन् या गर्दैनन् भन्ने विषय अहिले बहुप्रतिक्षित छ।</p>
प्रतिक्रिया दिनुहोस्
.jpg)
