सडक विस्तारका लागि आफैँ घर भत्काउँदै स्थानीयवासी
<p>तुलसीपुर। सडक विस्तार हुन थालेपछि तुलसीपुर उपमहानगरपालिका-६ ज्ञानज्योति मार्ग टोलका बासिन्दाले आफैँ घर भत्काउन थालेका छन्।</p>
<p>तुलसीपुर विकास प्राधिकरणले सडक विस्तार गर्न शुरू गरेपछि टोलवासी सडक क्षेत्रमा पर्ने घर आफैँ भत्काउन थालेका हुन्।</p>
<p>प्राधिकरणले सो क्षेत्रमा सडक कालोपत्र गर्नका लागि ज्ञानज्योति मार्गमा ३०० मिटर सडक विस्तार गर्न लागेको वडाध्यक्ष नवराज लामिछानेले बताए। उनका अनुसार ५० वटा घर भत्काइएको छ।</p>
<p>“विकास प्राधिकरणअन्तर्गत वडा नं ६ को त्यस क्षेत्रमा सडक विस्तार गर्ने योजना थियो”, उनले भने, “सोहीअनुसार त्यहाँका बासिन्दाले आफ्नै सक्रियतामा घर भत्काउन थालिएको छ ।”</p>
<p>पछिल्लो समय तुलसीपुर उपमहानगरपालिकाले विकास प्राधिकरणको काम अघि बढाएको छ । प्राधिकरणअन्तर्गत अहिले सडक ग्राभेल भइरहेको छ।</p>
<p>उपमहानगरपालिकाले यस वर्ष ५७ किलोमिटर सडक कालोपत्रे गर्दैछ।</p>
<p>अहिलेसम्म तुलसीपुरका १२ वटा वडामा ग्राभेलको काम पूरा भइसकेको छ। त्यस्तै सात वटा वडामा ग्राभेलको काम भइरहेको इञ्जिनीयर पवनकुमार योगीले जानकारी दिए।</p>
<p>तुलसीपुर उपमहानगरपालिका- १ मा वडा कार्यालय अगाडिको बाटो र मनकामना मन्दिर (देव स्थान) जाने बाटो, वडा नं. २ को खैरीपुर, मनिकापुरलगायत, वडा नं. ३ को भट्टे, दमारगाउँ, राणागाउँ, वडा नं. ६ को ६ स्थान, वडा नं. १४ को लुहाडबरा, वडा नं. १५ को ढमक्कापुर र वडा नं. ८ तथा १६ मा ग्राबेलको काम सकिएको छ।</p>
<p>यसैगरी वडा नं ४, ५, ७, १०, १९, ११ र १३ मा अहिले ग्राबेलको काम जारी रहेको छ।</p>
<p>बाँकी वडामा पनि अबको केही समयमा काम पूरा हुने बताइएको छ।</p>
<p>प्राधिकरणले प्रत्येक वडामा तीन/तीन किलोमिटरको दरले कालोपत्रे लागि २२ करोड खर्च लाग्ने बताएको छ। <em>रासस</em></p>
प्रतिक्रिया दिनुहोस्
.jpg)
