कैलालीका सीमा क्षेत्रका वासिन्दा अझै ढिके नूनकै भरमा
<p>लम्की। भारतसँग सीमा जोडिएका कैलालीका दक्षिणी गाउँका नागरिक अझै पनि ढिके नून खान बाध्य छन्।</p>
<p>भारतीय नागरिकले साइकलमा बोकेर सीमावर्ती गाउँमा भारतीय गुणस्तरहीन ढिके नून बिक्री गरिरहेका छन्।</p>
<p>“साइकलमा भारतबाट भित्रिएको ढिके नून नै आयोडिन नूनभन्दा सस्तो हुन्छ”, टीकापुर-९ खक्रौलाकी सीमा बुढाले भने, “खाद्यान्न, पुरानो फलाम, टुटेफुटेका प्लास्टिकलगायतका कवाडी सामानसँग साटेर ढिके नून मिल्छ । किन महँगो नून खानु भनेर यही खान्छौँ ।”</p>
<p>भारतीय नागरिकले बिक्री गर्ने ढिके नून उपभोग गर्दै आएका स्थानीयवासीलाई ढिके नूनको वेफाइदाबारे जानकारी छैन।</p>
<p>“नून कस्तो हो भन्नेबारेमा त हामीलाई खासै जानकारी छैन”, खक्रौलाकै तर्कबहादुर सुनार भन्छन्, “पुरानै चलन हो, हामी त यस्तै नून खाँदै आएका छौँ।”</p>
<p>भारतले औद्योगिक प्रयोजनका लागि आयोडिनविहीन ढिके नून उत्पादन गर्दै आएको छ।</p>
<p>ढिके नून खासगरी छालाका सामग्री गलाउन प्रयोग हुन्छ। सोही नून बोरामा राखेर नेपालका सीमावर्ती क्षेत्रमा भित्र्याई बिक्री भइरहेको छ।</p>
<p>ढिके नून बोरामा राखेर नेपालका सीमावर्ती क्षेत्रमा भित्र्याई बिक्री भइरहेको साल्ट ट्रेडिङ कर्पोरेशन धनगढीका सूचना अधिकारी तेजबहादुर कुँवरले बताए। </p>
<p>निकासी पैठारी ऐन, २०१३ ले तोकिएको संस्थाबाहेक अरुले नुन आयात गर्न नपाउने व्यवस्था गरेको छ।</p>
<p>नेपालमा साल्ट ट्रेडिङ कर्पोरेसनले मात्रै नेपालमा नून आयात गर्दै आएको छ।</p>
<p>कुँवरले कुनै पनि व्यक्तिले भारतबाट एक किलो नून पनि ल्याउन नपाउने बताए।</p>
<p>“प्रहरी र प्रशासनसँग आयात रोक्नका लागि बेला बेला पत्राचार भइरहेको हुन्छ, तैपनि आउने गरेको छ, त्यो अवैध काम हो”, उनले भने “राज्यका सुरक्षा संयन्त्रले रोक्नुपर्छ ।”</p>
<p>साल्ट ट्रेडिङले सीमा क्षेत्रमा रहेका प्रहरी कार्यालयले नुन तस्करी रोक्न ध्यान नदिएको जनाएको छ। <em>रासस</em></p>
प्रतिक्रिया दिनुहोस्
.jpg)
