भरतपुर महानगरलाई ध्रुम्रपानरहित शहर बनाइँदै
<p>चितवन। भरतपुर महानगरपालिकाले सार्वजनिक स्थलमा सुर्तीजन्य वस्तुको बेचबिखन तथा सेवनमा प्रतिबन्ध लगाएको छ। </p>
<p>यसको लागि नियमित अनुगमन शुरू गरिएको महानगरका प्रवक्ता अरुण पीडित भण्डारीले बताए। </p>
<p>'सुर्तीजन्य पदार्थ नियन्त्रण र नियमन गर्ने ऐन २०६८' अनुसार अनुगमन गरिएको र महानगरलाई सुर्तीजन्य पदार्थरहित बनाउन अभियान थालिएको भण्डारीले बताए।</p>
<p>अनुगमन टोलीले शैक्षिक संघसंस्था, सरकारी कार्यालय, अस्पताल बालगृहलगायत निकाय आसपासका क्षेत्रमा हुने सुर्तीजन्य पदार्थको बिक्री भए/नभएको अनुगमन गरिरहेको छ ।</p>
<p>उपसचिव प्रधुन्नप्रसाद उपाध्यायको नेतृत्वमा प्रत्येक दिनजसो बजार अनुगमन गरिँदै आइएको छ ।</p>
<p>अनुगमनका क्रममा ३५ पसलमध्ये १३ पसलमा यस्ता सामग्री पाइएको र चुरोट सेवन गर्दै गरेका दुईजना व्यक्तिलाई समेत कारवाही गरिएको छ।</p>
<p>आउँदो डिसेम्बर महीना सम्ममा महानगरपालिकालाई ध्रुम्रपानरहित शहर (स्मोक फ्री सिटी) बनाउने महानगरपालिकाले तयारी थालेको छ।<br />
<br />
भरतपुरकी मेयर रेनु दाहालका अनुसार ध्रम्रपानरहित शहर घोषणा गर्न समिति निर्माण गरी हरेक महिनाको एक दिन बैठक बसेर काम शुरू गरिएको छ।</p>
<p>गत महिना इन्डोनेसियाको बोगर नगरमा भएको कार्यक्रममा दाहालले भरतपुर महानगरलाई ‘स्मोक फ्री’ सिटी बनाउने प्रतिबद्धता जनाएकी थिइन्। <em>रासस</em></p>
प्रतिक्रिया दिनुहोस्
.jpg)
