Others

गृहपृष्ठ

बुटवलमा हुने प्रदेश लगानी सम्मेलन स्थगित बुटवल। प्रदेश ५ सरकारले आगामी वैशाखमा आयोजना गर्न लागेको प्रदेश लगानी सम्मेलन स्थगित गरिएकाे छ। आज बसेको प्रदेश मन्त्रिपरिषद्को बैठकले विश्वभरि नै कोरोना (कोभिड-१९) भाइरसको सक्रमण बढेसँगै नेपाल पनि त्यसको उच्च जोखिममा रहेको अवस्थामा उच्च सतर्कता अपनाउन लगानी सम्मेलन हाललाई स्थगित गर्ने निर्णय गरेको प्रदेश सरकारका प्रवक्ता तथा भौतिक पूर्वाधार विकासमन्त्री बैजनाथ चौधरीले जानकारी दिए। प्रदेश सरकारले प्रदेशमा लगानीको वातावरण जुटाउन आगामी ४-५ वैशाखमा बुटवलमा लगानी सम्मेलन आयोजना गर्ने कार्यक्रम थियो। सम्मेलनमा भाग लिन स्वदेशी तथा विदेशी पाहुनासमेत आउने भएकाले कोभिड-१९ भाइरसको सक्रमणको उच्च जोखिमलाई मध्यनजर गर्दै सम्मेलन स्थगन गरिएको प्रवक्ता चौधरीले जानकारी दिए। सम्मेलनको अर्को मिति भने परिस्थिति सहज बनेपछि तय गरिने उनले जानकारी दिए। यस्तै कोरोना भाइरसको संक्रमण नियन्त्रणसँगै सतर्कता अपनाउन केन्द्र सरकारको सजगता तयारीलाई कार्यान्वयन गर्ने निर्णयसमेत गरेको प्रवक्ता चौधरीले बताए। प्रदेश सरकारले प्रदेशका १२ वटै जिल्लाका प्रमुख जिल्ला अधिकारीमार्फत् जिल्लामा आयोजना हुने मेला महोत्सव तथा मानिस भेला हुने कुनै पनि खालका कार्यक्रममा रोक लगाउन निर्देशनसमेत दिने बैठकले निर्णय गरेको उनकाे भनाइ छ। बैठकले भौतिक पूर्वाधार विकास मन्त्रालयको प्रस्तावमा सडक निर्माण, मर्मतसम्भार तथा विस्तार गर्ने सम्बन्धमा व्यवस्था गर्न बनेको विधेयक प्रदेश सभा समक्ष पेस गर्न स्वीकृति प्रदान गर्ने निर्णय गरेको छ। यस्तै सामाजिक विकास मन्त्रालयको प्रस्तावमा प्रदेश विज्ञान प्रविधि प्रतिष्ठान स्थापना र सञ्चालनसम्बन्धी विधेयकको अवधारणापत्रमा सैद्धान्तिक स्वीकृति प्रदान गर्ने निर्णय गरेको प्रवक्ता चौधरीले जानकारी दिए। यस्तै मन्त्रिपरिषद् बैठकले उद्योग, पर्यटन, वन तथा वातावरण मन्त्रालयको प्रस्तावमा साझेदारी नियमावली २०७६ लाई स्वीकृत गरेको छ भने प्रादेशिक साहित्य कला प्रतिष्ठान सम्बन्धमा व्यवस्था गर्न बनेको विधेयकको अवधारणापत्रमा सैद्धान्तिक स्वीकृति प्रदान गर्नेसमेत निर्णय गरेको छ। बैठकले प्रदेश सरकारअन्तर्गतका ११औं तहका चिकित्सक डाक्टर मनिलाल नेवार श्रेष्ठलाई लुम्बिनी प्रादेशिक अस्पतालमा कामकाजमा खटाउनेसमेत निर्णय छ। रासस