नेपाल-बंगलादेश व्यापार अब बंगलाबन्ध नाकाबाट
<p>काठमाडौं। नेपाल–बंगलादेश भन्सारस्तीय वार्तामा बंगलाबन्ध नाका प्रयोग गरेर बंगलादेशसँगको व्यापार गर्न दुवै देश सहमत भएका छन्। </p>
<p>१८-१९ फागुनमा ढाकामा भएको भन्सारस्तरीय वार्ताबाट यसअघि भारतको कलकत्ताबाट हुँदै आएको बंगलादेशसँगको व्यापार अब झापाको मेची भन्सार र बंगलादेशको बंगलाबन्ध नाकाबाट सिधै हुने सहमति भएको हो।</p>
<p>सहमतिअनुसार नेपालले पूर्वी व्यापारिक नाका झापाको मेची भन्सार सुधार गर्नु पर्ने छ।</p>
<p>यस्तै, बंगलादेशले बंगलाबन्ध नाकालाई व्यवस्थित र आधुनिक बनाइने छ।</p>
<p>दुई महीनाभित्र बैंक स्थापना तथा भन्सार नाकामा आवश्यक कर्मचारी राख्ने सहमति भएको वार्तामा नेपालको नेतृत्व गरिरहेका भन्सार विभागका महानिर्देशक सुमन दाहालले जानकारी दिए।</p>
<p>दाहालका अनुसार हालसम्म नेपाल र बंगलादेशबीचको व्यापार बंगलाबन्ध नाकाबाट न्यून मात्रामा हुन्थ्यो। बंगलादेशले सामान लैजानु परे भारतको कलकत्ता नाका प्रयोग गर्न भन्दै आएको थियो।</p>
<blockquote>
<p><strong>मेची भन्सार र बंगलाबन्ध नाकाबीचको दूरी ३८ किलोमिटर छ। जसमा झण्डै ३५ किलोमिटर क्षेत्र भारतमा पर्छ। यदी यो नाकाबाट नेपाल र बंगलोदेशबीच सिधै व्यापार भएमा लागत र समय कम पर्न आउँछ।</strong></p>
</blockquote>
<p>यसअघि यस नाकाबाट अम्रिसो र चिया तथा तरकारीजन्य वस्तुलगायत थोरै परिमाणमा बंगलादेश निर्यात हुँदै आएको थियो।</p>
<p>तर, हालैको वार्तामा भएको सहमतिसँगै नेपालको मेची भन्सारबाट भारतको फूलबारी–पानीट्यांकी हुँदै बंगलादेशको बंगलाबन्ध नाकाबाट सिधै व्यापार हुने बाटो खुलेको छ।</p>
<p>ती व्यापारिक नाकामा आवश्यक पूर्वाधार निर्माणको लागि भारतसँग त्रिपक्षीय वार्ता गरिने छ।</p>
<p>मेची भन्सार र बंगलाबन्ध नाकाबीचको दूरी ३८ किलोमिटर छ। जसमा झण्डै ३५ किलोमिटर क्षेत्र भारतमा पर्छ।</p>
<p>यदी यो नाकाबाट नेपाल र बंगलोदेशबीच सिधै व्यापार भएमा लागत र समय कम पर्न आउँछ।</p>
<p>“यो नाका संचालनमा आए अब झापा, इलाम, ताप्लेजुङ र पाँचथरलगायत पूर्वी नेपालमा उत्पादन हुने तरकारी तथा फलफूलको निर्यात गर्न सकिने छ”, महानिर्देशक दाहालले भने।</p>
<p>बंगलादेश समुन्द्री सतहमा अवस्थित मुलुक भएकाले वर्षा याममा थोरै पानी परेपछि जमिन भासिने सम्भावना हुन्छ। यस्तो अवस्थामा त्यहाँ उत्पादनमा ह्रास आउँछ।</p>
<p>व्यापारका लागि नयाँ बाटो खुलेसँगै नेपालबाट बंगलादेशतर्फ अलैँची र अदुवाको निर्यात बढ्ने छ।</p>
<p>नेपाल अलैँची र अदुवाको निर्यातकर्ता देशहरूमध्ये विश्वकै प्रमुख पाँचको सूचीसम्म अटाउँदै आएको छ।</p>
<p>यस्तै, आजदेखि ढाकामा हुने वार्ताबाट धागोको निर्यात खुले यही नाकाबाटै निर्यात गर्ने अनौपचारिक सहमति भएको छ।</p>
<p>हाल नेपालले वार्षिक १० अर्ब रुपैयाँभन्दा बढीको धागो निर्यात गर्न सक्ने क्षमता छ।</p>
<p>तर, धागोको उच्च माग रहेको बंगलादेशले धागो आयातमा प्रतिबन्ध लगाउँदा नेपाली धागोले अन्य बजार खोज्नु परेको छ।</p>
<p>गत वर्ष बंगलादेशले एक्रेलिक धागोको आयात खुलाए पनि बंगलादेशमा उक्त धागोको माग न्यून छ।</p>
प्रतिक्रिया दिनुहोस्
.jpg)
