कोरोना भाइरस संक्रमणको प्रभावले अन्नपूर्ण पदमार्ग सुनसान
<p>मनाङ। कोरोना भाइरस संक्रमणको बढ्दो दरसँगै यसको प्रभावले अन्नपूर्ण पदमार्ग सुनसान बनेको छ।</p>
<p>लमजुङको सदरमुकाम बेँसीशहरबाट शुरू चक्रीय अन्नपूर्ण पदमार्ग कास्कीको पोखरा पुगेर सकिन्छ।</p>
<p>विगत वर्षहरूमा विदेशी पर्यटकको लर्को लाग्‍ने यो समयमा अहिले पर्यटक देख्नै रहर भएको छ।</p>
<p>लमजुङ बेँसीशहर हुँदै खुदीभुलभुले, बाहुनडाँडा, जगतच्याम्चे, जगत भएर पर्यटक मनाङ आउने क्रम ठप्प भएको छ।</p>
<p>पर्यटनकै भरमा रहेका व्यवसायी र होटल व्यवसायी पर्यटन नआउँदा निराश भएका छन्।</p>
<p>"गत वर्ष अहिलेकै सिजनमा होटलका कोठाले नपुगेर टेन्टमा पर्यटक राख्नुपरेको थियो, अहिले सबै खाली नै छन्", पर्यटन व्यवसायी विनोद गुरुङ भन्छन्।</p>
<p>हिमपातको प्रभाव पर्दै आएको यस पदमार्गमा अहिले विश्‍वव्यापी फैलिएका रोगले यो पदमार्गमा आउने पर्यटक दिनानुदिन घट्दै गएका छन्। </p>
<p>व्यवसायी मिङ्मार लामाका अनुसार दुई/चार दिन अगाडि एकदुई पर्यटक देखिए पनि अहिले भने सुनसान नै छ।</p>
<p>जिल्ला प्रशासन कार्यालय मनाङ र अन्नपूर्ण संरक्षण क्षेत्रले कोरोनाबाट सम्भावित संक्रमण न्यूनिकरण गर्न सतर्क रहन अनुरोध गरेका छन्। <em>रासस</em></p>
प्रतिक्रिया दिनुहोस्
.jpg)
