खतिवडा अर्थमन्त्री नियुक्त, शीतल निवासमा शपथको तयारी
<p>काठमाडौं। राष्ट्रपति विद्यादेवी भण्डारीले डा. युवराज खतिवडालाई अर्थ र सञ्चार तथा सूचना प्रविधि मन्त्री नियुक्त गरेकी छन्।</p>
<p>२० फागुनमा राष्ट्रिय सभाको कार्यकाल सकिएपछि पदबाट राजीनामा दिएका खतिवडालाई प्रधानमन्त्री केपी शर्मा ओलीको सिफारिसमा आज राष्ट्रपतिले मन्त्री नियुक्त गरेकी हुन्।</p>
<p>राष्ट्रपति कार्यालयका प्रवक्ता हरिप्रसाद दाहालले विज्ञप्ति निकालेर राष्ट्रपति भण्डारीले खतिवडालाई संविधानको धारा ७८ को उपधारा (१) बमोजिम मन्त्री पदमा नियुक्त गरेको जानकारी दिएका छन्।</p>
<p>संविधानको उक्त धारामा संघीय संसदको सदस्य नभएको व्यक्तिलाई पनि प्रधानमन्त्रीको सिफारिसमा राष्ट्रपतिले मन्त्री नियुक्त गर्न सक्ने व्यवस्था छ।</p>
<p>तर, यसरी नियुक्त मन्त्री पदमा निरन्तर रहनका लागि भने ६ महीनाभित्र संघीय संसदको सदस्यता प्राप्त गर्नुपर्ने हुन्छ।</p>
<p>नवनियुक्त मन्त्री खतिवडाको राष्ट्रपति कार्यालय शीतल निवासमा आजै अपरान्ह शपथ गराउने तयारी भएको बताइएको छ।</p>
<p><img alt="" height="1321" src="https://www.dekhapadhi.com/storage/photos/shares/Politics/001-मन्त्रिपरिषद्-गठन_विज्ञप्ति.jpg" width="960" /></p>
प्रतिक्रिया दिनुहोस्
.jpg)
