प्रिमियर लिगमा ‘फेयर प्ले ह्याण्डसेक’ नगर्न निर्देशन
<p>काठमाडौं। इङ्लिस प्रिमियर लिगले कोरोना भाइरस संक्रमणका कारण अर्को सूचना नआउँदासम्म खेलअघि दुई टीमका खेलाडी र अफिसियलबीच हात नमिलाउन (फेयर प्ले ह्याण्डसेक) निर्देशन दिएको छ।</p>
<p>बेलायत सरकारले प्रिमियर लिगलाई आकस्मिक रूपमा कोरोना भाइरस संक्रमणविरुद्ध योजना बनाउन भनेको भोलीपल्ट यस्तो निर्णय आएको हो।</p>
<p>तथापी खेलअघि पहिलेजस्तै लाइनअप भने हुनेछ। तर, घरेलु टीमले विपक्षी खेलाडीसँग हात नमिलाई पहिलो लाइन छाड्नेछ।</p>
<p>प्रिमियर लिगले जारी गरेको विज्ञप्तिमा भनिएको छ, ‘‘यसै साताबाट अर्को सूचना नआउँदासम्म प्रिमियर लिग फेयर प्लेअन्तगर्त दुई टीमका खेलाडी र अफिसियलबीच हात नमिलाउनु होला। कोरोना भाइरस नाक र मुखबाट हातमा सर्न सक्छ र हात मिलाउँदा अर्को व्यक्तिमा सर्न सक्छ।’’</p>
<p>प्रिमियर लिगको शीर्ष स्थानमा रहेको लिभरपुलले अब एनफिल्डमा मस्कट नराख्ने घोषणा गरिसकेको छ भने आफ्नो स्टाफलाई उच्च जोखिम भएका देशमा भ्रमण नगर्न भनिसकेको छ।</p>
<p>क्लबले एनफल्डको प्रत्येक ‘वासरूम’ मा सेनिटाइजर वा एन्टीब्याक्टोरियल ह्याण्डवास राखिएको जनाएको छ।</p>
<p>त्यसका साथै क्लबले एनफिल्डमा सुचनामुलक पोष्टर पनि टाँसिएको जनाएको छ।</p>
<p>साउथह्याम्पटनले खेलाडीलाई समर्थकसँग अटोग्राफ दिन र सेल्फी खिच्न मनाही गरेको छ। वेष्ट ह्यामका प्रशिक्षक डेबिड मोयस र न्युक्यासलका प्रशिक्षक स्टिभ ब्रुसले पनि हात मिलाउन रोकेका छन्।</p>
<p>अहिलेसम्म विश्वभर ८७ देशमा ९० हजारभन्दा धेरैमा कोराना भाइरस संक्रमण देखा परेको छ।</p>
प्रतिक्रिया दिनुहोस्
.jpg)
