प्रधानमन्त्रीले टेलिफोन गरेर सोधे- ‘काम के कस्तो भइरहेको छ?’
<p>काठमाडौं। प्रधानमन्त्री केपी शर्मा ओलीले मिर्गौला प्रत्यारोपणपछि आफ्नो स्वास्थ्य तीब्र गतिमा सुधार भइरहेको र आफू छिटै काममा फर्कन सक्ने बताएका छन्।</p>
<p>प्रधानमन्त्री ओली अहिले त्रिभुवन विश्वविद्यालय शिक्षण अस्पतालको सघन उपचार कक्ष (आइसीयू)मा छन्।</p>
<p>२१ फागुनमा उनको मिर्गौला प्रत्यारोपण गरिएको हो। प्रधानमन्त्रीको दोस्रोपटक मिर्गौला प्रत्यारोपण गरिएको हो।</p>
<p>प्रधानमन्त्री ओलीले आज बिहान आफ्ना प्रमुख सल्लाहकार विष्णु रिमालसँग कुरा गर्दै आफू छिटै काममा फर्कन सक्ने बताएका हुन्।</p>
<p>“प्रधानमन्त्रीज्यूले मसँग कुरा गर्न चाहनु भएको रहेछ, त्यहीअनुसार आज बिहान उहाँसँग टेलिफोनमा छोटो कुराकानी भयो”, रिमालले <em>देखापढी</em>सँग भने, “साथीहरुलाई भनिदिनुस्, मेरो स्वास्थ्य तीब्र गतिमा सुधार भइरहेको छ, अब छिटै काममा फर्कन सक्छु होला भन्नुभो।”</p>
<p>त्यसक्रममा प्रधानमन्त्री ओलीले सरकारको कामकारवाही के कस्तो भइरहेको छ भनेर सोधेको रिमालले बताए।</p>
<p>“मैले यसबारे तपाईं चिन्ता नलिनुस्, उपप्रधानमन्त्रीज्यू, मन्त्रीहरु र अख्तियारप्राप्त सबै संयन्त्रले आफ्नो काम गरिरहेका छन् भनेर आश्वस्त पारें”, उनले भने।</p>
<p>प्रधानमन्त्री ओलीलाई मिर्गौला प्रत्यारोपणपछि चिकित्सकबाहेक अरू कसैले भेटेका छैनन्। संक्रमणको उच्च जोखिम हुने भएकाले अहिलेसम्म पत्नी राधिका शाक्यलेसमेत प्रधानमन्त्रीलाई नभेटेको प्रमुख सल्लाहकार रिमालले बताए।</p>
<p>“आइसीयूमा रहेका ड्युटीका डाक्टरहरुले मात्र उहाँलाई भेट्नु हुन्छ, त्यसबाहेक अरु को को डाक्टरले भेट्ने भनेर निजी चिकित्सक दिव्या सिंह शाहले निर्धारण गर्नुहुन्छ”, उनले भने।</p>
<p>प्रधानमन्त्री ओलीले टेलिफोनमा कुरा गर्दा वरपर कोही भए ह्याण्ड्स–फ्री गरेरै आफ्नो आवाज सुनाइदिनसमेत भनेका थिए।</p>
<p>“मेरो छेउछाउमा डाक्टरहरु मात्र हुनुहुन्थ्यो, त्यहीकारण ह्यान्ड्स-फ्री गर्नु परेन”, रिमालले भने।</p>
प्रतिक्रिया दिनुहोस्
.jpg)
