कोरोना भाइरसबाट इटालीमा १४८ जनाको मृत्यु
<p>इटाली। इटालीमा कोरोना भाइरसबाट १४८ जनाको मृत्यु भएकाे छ। इटालीमा हिजाे, २२ फागुनमा मात्र ४१ जनाको मृत्यु भएको समाचारमा जनाइएकाे छ।</p>
<p>यो समेत गरी यहाँ यस भाइरसको प्रकोपबाट मृत्यु हुनेको संख्या १४८ पुगेको हो।</p>
<p>इटालीका विभिन्न २२ वटा शहरमा यसको प्रकोप देखिएको छ। इटालीले देशैभरिका विद्यालय, विश्वविद्यालय बन्द गराएको छ। सरकारले यो भाइरसको नियन्त्रणका विभिन्न कार्यक्रम घोषणा गरी कार्यान्वयन गराएको छ।</p>
<p>संयुक्तराज्य अमेरिकाको क्यालिफोर्नियामा पनि यस प्राणघातक कोरोना जीवाणु (भाइरस)का कारण एक व्यक्तिको मृत्यु भएपछि संकटकाल घोषणा गरिएको अर्काे एक समाचारमा जनाइएको छ।</p>
<p>विश्वभर हाल कोरोना संक्रमित व्यक्तिको संख्या ९६ हजारभन्दा बढी पुगिसकेको छ। तीमध्ये करिब ८० हजार भन्दा बढी चीनमा रहेको <em>बिबिसी</em>ले जनाएको छ। गत डिसेम्बरको अन्त्यबाट चीनको हुबेई प्रान्तको वुहान शहरबाट शुरू भएको यस कोरोना भाइरस संक्रमणबाट चीनमा मात्र तीन हजारभन्दा बढीको मृत्यु भएको छ।</p>
<p>कोरोनाकै कारण दक्षिण कोरियामा हालसम्म ४३ जनाको मृत्यु भइसकेको छ। त्यसैगरी ६ हजार ५९३ जनामा कोरोना संक्रमण देखिएको आज प्राप्त एक समाचारमा जनाइएको छ।</p>
<p>जोखिम नियन्त्रण गर्न दक्षिण कोरियाका प्रधानमन्त्री चुङ स्ये–क्यूनले अनुहारमा लगाउने मास्क विदेश निर्यात गर्न प्रतिबन्ध लगाइएको घोषणा गरेका छन्। <em>रासस-एएनआई</em></p>
प्रतिक्रिया दिनुहोस्
.jpg)
