कञ्चनपुरको गड्डाचौकी नाकामा हेल्थ डेस्क राखियाे, क्वारेन्टाइन पनि राख्ने तयारी
<p>काठमाडौं। कोरोना भाइरसको सम्भावित संक्रमण नियन्त्रणका लागि नेपाल-भारत सिमाना कञ्‍चनपुरको गड्डाचौकी नाकामा हेल्थ डेस्क राखिएको छ। </p>
<p>सो नाका हुँदै कञ्‍चनपुरबाट भारतको नयाँ दिल्लीसम्म दैनिक पाँचदेखि ६ वटा सिधा बससेवा संचालनमा छ। </p>
<p>पछिल्लो समयमा भारतमा पनि कोभिड-१९ का बिरामी देखिएपछि नाकामा सतर्कता अपनाउँदै पूर्व तयारी थालिएको कञ्‍चनपुरका प्रमुख जिल्ला अधिकारी नुरहरी खतिवडाले देखापढीलाई बताए। </p>
<p>भीमदत्तनगरपालिका कार्यालयसँगको समन्वयमा त्यहाँ डेस्क स्थापना गरिएको हो। </p>
<p>“चौबिसै घण्टा स्वास्थ्यकर्मीलाई अलर्ट राखेका छौं”, सीडीओ खतिवडाले भने, “प्रारम्भिक स्वास्थ्य परीक्षणको क्रममा कोही शंकास्पद भेटिए महाकाली अस्पतालमा आइसोलेटेड वार्डको तयारी छ।” </p>
<p>उनका अनुसार २३ फागुनमा जिल्ला विपद् पूर्वतयारी समितिको बैठक बसेर कोरोना भाइरसको संक्रमणको जोखिम न्यूनीकरणका लागि सचेतना गतिविधि गर्ने, त्रास तथा अफबाह फैलाउने र बजारमा कृत्रिम अभाव सिर्जना गर्नेलाई कारवाही गर्ने निर्णय गरिएको छ। </p>
<p>दैनिक भारत आवतजावत गर्नेको संख्या धेरै हुने भएकाले गड्डाचौकी नाका नजिकै कुनै घरलाई क्‍वारेन्टाइन स्थल बनाउन गृहकार्य थालिएको र प्रदेश सरकारसँग बजेट माग गरिएको छ।</p>
प्रतिक्रिया दिनुहोस्
.jpg)
