राप्रपा र राप्रपा संयुक्तबीच एकीकरण, २८ फागुनमा घोषणा गरिने
<p>काठमाडौं। राष्ट्रिय प्रजातन्त्र पार्टी (संयुक्त) र राष्ट्रिय प्रजातन्त्र पार्टीबीच एकताको सहमति भएको छ।</p>
<p>एकीकरणसम्बन्धी आधारपत्रमा पशुपतिशम्शेर जबरा, डा. प्रकाशचन्द्र लोहनी र कमल थापाले २४ फागुन राति हस्ताक्षर गरेका छन्।</p>
<p>पार्टी एकीकरणको घोषणासभा २८ फागुनमा तय गरिएको छ।</p>
<p>सहमतिअनुसार एकीकृत पार्टीमा राणा, लोहनी र थापा तीनजना अध्यक्ष रहनेछन्। नाम राष्ट्रिय प्रजातन्त्र पार्टी (राप्रपा) रहनेछ।</p>
<p>केन्द्रीय समितिमा मनोनयन, सचिवालय निर्माण, जिम्मेवारी बाडफाँटलगायत दैनिक कार्यसञ्चालन तीन अध्यक्षको सहमतिमा गरिनेछ ।</p>
<p>एकीकृत राप्रपाले राजसंस्थासहितको प्रजातन्त्र, सनातन हिन्दू राष्ट्र अंगीकार गर्ने निर्णय गरेको छ।</p>
<p>त्यसैगरी शक्ति हस्तान्तरणको सिद्धान्तमा आधारित सुदृढ स्थानीय स्वायत्त शासन, उदार अर्थतन्त्र र असंलग्न परराष्ट्र नीतिसमेत अवलम्बन गर्ने बताइएको छ।</p>
<p>विधान सञ्चालनमा कुनै बाधा पर्न गएमा तीन जना अध्यक्षको सहमतिमा बाधा अड्काउ फुकाउ गर्ने सहमति छ।</p>
<p>हालका लागि भने राप्रपाको विधानलाई अन्तरिम विधान मानिएको छ।</p>
<p>छ महीनाभित्र विधान कमिटीले विधान प्रस्ताव गर्ने छ। सहमतिअनुसार डेढ वर्षभित्र एकीकृत पार्टीको महाधिवेशन गरिने छ।</p>
<p>सहमतिअनुसार हाल कायम रहेका दुवै दलका निर्वाचन चिह्न छ महीनाका लागि स्थगन गरिएको छ।</p>
<p>झण्डाको हकमा अहिलेको राप्रपाको झण्डा नै प्रयोग गरिनेछ। <em>रासस</em></p>
प्रतिक्रिया दिनुहोस्
.jpg)
