आज होली पर्व, कोरोना संक्रमणको जोखिमका कारण रौनक घट्यो
<p>काठमाडौं। फागुन शुक्ल पूर्णिमाको दिन आज पहाडी तथा हिमाली जिल्लाहरूमा (फागु) होली पर्व मनाइँदैछ।</p>
<p>वसन्त ऋतुको आगमनसँगै मेलमिलाप र आपसी सद्‍भावको सन्देश लिई आउने होली विभिन्‍न रङ र लोला खेली मनाउने परम्परा छ।</p>
<p>विष्णुका भक्त प्रह्लादलाई मार्न बहिनी होलिकाले प्रल्हादलाई काखमा राखेर अग्निमा दहन हुँदा होलिका मरेकी र प्रल्हाद भने जीवितै रहेको पुराणको कथा प्रसंग होलीसँग जोडिएको छ।</p>
<p>फागुन शुक्ल अष्टमीका दिन (१९ फागुन) मा वसन्‍तपुर दरबार पटाङ्गिनीमा होलीको चीर गाडिएसँगै यो पर्व शुरू भएको थियो। </p>
<p>तर, विश्वव्यापी फैलिएको कोरोना भाइरस संक्रमणको जोखिम बढेकाले यो वर्ष होलीको रौनक कम छ।</p>
<p>सरकार एवं मातहतका निकायहरूले भीडभाड, ठूला समारोह, सार्वजनिक कार्यक्रम नगर्न अनुरोध गरेकाले होलीको रौनक पनि घटेको छ।</p>
<p>गृह मन्त्रालयले सूचना निकालेर लोलापानी फ्याँक्ने, रंग तथा अबिर दल्ने काम जोखिमपूर्ण हुने हुँदा यस्ता गतिबिधि नगर्न अनुरोध गरेको छ ।</p>
<p>गृह मन्त्रालयका सहसचिव केदारनाथ शर्माले २४ फागुनमा जारी गरेको विज्ञप्तिमा भनिएको छ, “कोभिड–१९ को जोखिमको सन्दर्भमा सभा, सम्मेलन भेला स्थगित गर्न र सन्निकट होलीमा विगतमा जस्तै भीडभाड र भेलाजम्मा हुने, लोलापानी फ्याक्ने, शरीरमा रङ अविर दल्ने कार्य पनि जोखिमपूर्ण नै हुने हुँदा सो कार्य नगर्नु/नगराउनु हुन अनुरोध छ।”</p>
<p>विश्‍व स्वास्थ्य संगठनले नेपाललाई कोभिड-१९ को उच्च जोखिममा राखेसँगै सतर्कता अपनाइएको छ।</p>
प्रतिक्रिया दिनुहोस्
.jpg)
