आयरल्याण्डविरुद्ध नेपालले पायो १४६ रनको लक्ष्य
<p>काठमाडौं। ओमनमा जारी टी–२० अन्तर्राष्ट्रिय शृंखला अन्तर्गत् आजको खेलमा नेपालले आयरल्याण्डबाट १४६ रनको लक्ष्य पाएको छ।</p>
<p>शृंखलामा नेपालको यो तेस्रो खेल हो।</p>
<p>टस जितेर ब्याटिङ रोजेको आयरल्याण्डले २० ओभरको समाप्तिमा ८ विकेट गुमाएर १४५ रन जोड्यो । आयरल्याण्डका पाउल स्टर्लिङले सर्वाधिक ५९ रन बनाए।</p>
<p>आयरल्याण्डको इनिङ्सको दोस्रो ओभरमै स्कोरबोर्डमा ७ रन मात्र जोडिएको अबस्थामा सन्दीप लामिछानेले केभिन ओब्राइनलाई आउट गरे पनि त्यसपछि आयरल्याण्ड सम्हालिएर खेल्दै विशाल योगफलतर्फ अग्रसर भएको थियो।</p>
<p>तर, १२ औं ओभरमा ललितनारायण राजवंशीले २८ बलमा आक्रामक ३८ रन बनाएका एन्डी बल्बिर्नाइलाई आउट गरेपछि नेपाल खेलमा फर्कियो। नेपालले लगत्तै दुइवटा रनआउटको अवसर गुम्न दिएन। </p>
<p>बलिङ परिवर्तनपछि आएका अविनाश बोहरा पनि प्रभावी बने । लगत्तै करन केसीले ४७ बलमा ५९ रन बनाएका पाउल स्टर्लिङको विकेट लिएपछि नेपाल खेलमा हावी भयो।</p>
<p>विशाल योगफलतर्फ अग्रसर भएको आयरल्याण्डलाई मध्यम स्कोरमा समेट्न सन्दीप लामिछाने र अविनाश बोहराले दुइ/दुइ विकेट लिए भने करन र ललितको नाममा एक/एक विकेट रह्यो। </p>
<p>टेस्ट मान्यताप्राप्त राष्ट्र आयरल्याण्डविरुद्ध अब नेपाली ब्याट्सम्यानको खास परीक्षा हुनेछ।</p>
<p>शृंखलामा नेपालले यसअघिका दुवै खेल जितेको छ । नेपालले पहिलो खेलमा हङकङ र दोस्रो खेलमा नेदरल्याण्ड्समाथि जित हात पारेको थियो।</p>
प्रतिक्रिया दिनुहोस्
.jpg)
