बेलायत बाहेकका युरोपेली देशका उडानलाई अमेरिका प्रवेशमा रोक
<p>काठमाडौं। अमेरिकाले कोरोना भाइरस संक्रमणको जोखिम नियन्त्रणको लागि बेलायत बाहेकका युरोपेली देशहरूबाट अमेरिकामा हुने उडानमा रोक लगाएको छ।</p>
<p>राष्ट्रपति डोनाल्ड ट्रम्पले टेलिभिजन सम्बोधनमार्फत भोलि, शुक्रबार मध्यरातदेखि लागू हुने गरी ३० दिनका लागि उक्त प्रतिबन्धको घोषणा गरेका हुन्।</p>
<p>यसबाट २६ वटा देशहरू प्रभावित भएका छन्।</p>
<p>ट्रम्पले यूरोपमा फैलिएको कोरोना भााइरसको संक्रमण अमेरिका छिर्न नदिन आफूले ठूलो निर्णय लिएको दाबी गरेको अन्तर्राष्ट्रिय संचारमाध्यमहरूले जनाएका छन्।</p>
<p>यसअघि चीनको उडानमा लगाएको रोकको निर्णयजस्तै युरोपेली देशबाट हुने यात्रामा प्रतिबन्ध लगाएको उनले दोहोर्‍याए।</p>
<p>ट्रम्पले भने, "नयाँ संक्रमण हाम्रो क्षेत्रमा भित्रिन नदिन हामी यूरोपबाट अमेरिकामा हुने सबै किसिमका यात्रालाई स्थगित गर्नेछौं।"</p>
<p>अमेरिकामा एक हजार १३५ जनामा कोरोना भाइरसको संक्रमण देखिएको छ। तीमध्ये ३८ जनाको मृत्यु भएको छ।</p>
<p>राष्ट्रपति ट्रम्पले अमेरिकाको अर्थतन्त्रमा कोरोनाभाइरसको प्रकोपको असरलाई रोक्नको लागि साना व्यवसायहरूलाई अर्बौं डलर सहुलियत दिने योजनाको पनि घोषणा गरेका छन्।</p>
<p>शुरूमा चीनको वुहानमा देखिएको कोभिड-१९ विश्वभर फैलिँदै गएपछि विश्‍व स्वास्थ्य संगठनले २८ फागुनमा <a href="https://dekhapadhi.com/news/8319" target="_blank">विश्‍वव्यापी महामारी</a>को घोषणा गरिसकेको छ।</p>
प्रतिक्रिया दिनुहोस्
.jpg)
