कोरोना भाइरस संक्रमणसँग जुध्न सरकारले माग्यो स्थानीय तहको सहयोग
<p>काठमाडौं। सरकारले कोरोना भाइरसको सम्भावित संक्रमणको सजगता, रोकथाम तथा नियन्त्रणको लागि स्थानीय तहसँग सहयोग मागेको छ।</p>
<p>संघीय मामिला तथा सामान्य प्रशासन मन्त्रालयले देशभरका स्थानीय तहहरूलाई पत्र पठाएर कोभिड-१९ को रोकथाम तथा नियन्त्रणका लागि समन्वयात्मक ढंगले काम गर्नुपर्ने भएकाले स्थानीय तहबाट जिम्मेवारीपूर्वक कामको लागि ११ बुँदे सहयोगको मागसहित सो अनुरोध गरेको हो।</p>
<p>विश्‍व स्वास्थ्‍य संगठनले हिजो, २८ फागुनमा कोभिड-१९ लाई विश्‍वव्यापी महामारी घोषणा गरेको छ।</p>
<p>स्थानीय तहलाई हिजै गरिएको लिखित अनुरोधमा नेपाल प्रवेश गर्ने मुख्य नाकाहरूमा स्वास्थ्य परीक्षण गर्न र सतर्कता अपनाउन भनिएको छ।</p>
<p>त्यस्तै भोज, उत्सव, भीडभाड हुने सार्वजनिक कार्यक्रमहरूमा सहभागी नहुन आव्हान गर्ने, स्थानीय तहहरूमा रहेका सबै अस्पताल तथा स्वास्थ्य केन्द्रहरूमा छुट्टै शैय्याको व्यवस्था मिलाउने, कोरोनाको आशंका लागेका बिरामीलाई प्रदेश र केन्द्रीय अस्पतालमा रिफर गर्ने मन्त्रालयले अनुरोध गरेको छ।</p>
<p>मास्क, सेनिटाइजर, औषधि, दैनिक उपभोग्य वस्तु तथा अत्यावश्‍यक सामग्री को अभाव हुन नदिन बजार अनुगमनलाई बढाउने, सीमावर्ती क्षेत्रमा अत्यावश्‍यक काममा बाहेक आवतजावत नगर्न सूचित गर्न पनि स्थानीय तहहरूसँग अनुरोध गरिएको छ।</p>
<p>मानिसहरूको भीडभाड हुने सिनेमा हल, बसपार्क, पार्टिप्यालेस, अपार्टमेन्टहरूमा परीक्षणको लागि स्वास्थ्यकर्मी खटाउन पनि सरकारले अनुरोध गरेको छ।</p>
प्रतिक्रिया दिनुहोस्
.jpg)
