दशैं भोजमा अचार खाँदा ३१ जना बिरामी
<p>सुर्खेत। वीरेन्द्रनगर नगरपालिका–११, पिपिरामा दशैँ भोजका लागि बनाइएको अचार खाँदा ३१ जना बिरामी परेका छन्।</p>
<p>स्थानीय रामप्रसाद लामिछानेको घरमा बनाइएको अचार खाँदा परिवार सदस्यसहित टीका थाप्न आएका पाहुनासमेत बिरामी परेका हुन् ।</p>
<p>स्थानीयवासी हिमप्रसाद पौडेलले आलु र काँक्राको अचार खाएलगत्तै बिरामी परेको बताए।</p>
<p>बिरामीहरुमा झाडाबान्ता हुने, रिङ्गटा लाग्ने, ज्वरो आउने, रक्तचाप कम हुने लक्षण देखिएको छ।</p>
<p>बिरामीहरुको २२ असोज दिउँसोदेखि वीरेन्द्रनगरस्थित माया नर्सिङ होम, बोहरा फार्मेसी र राना मेडिकलमा उपचार भइरहेको छ।</p>
<p>बिरामीमध्ये केही उपचारपछि घर फर्किएका छन्।</p>
<p>माया नर्सिङ होमका डाक्टर कृष्णदेव गिरीले बिरामीहरुलाई ‘फुड प्वाइजन’ भएको बताएका छन्। “अचारको नमूना परीक्षण गरेपछि मात्र समस्या पहिचान हुन्छ,” डा. गिरीले भने। <em>रासस</em> </p>
प्रतिक्रिया दिनुहोस्
.jpg)
